ಹುಣ್ಣಿಮೆ ಹೊಳಪು..!

ಅಮ್ಮ, ಅಡುಗೆ ಮನೆಯ 

ಹೊಗೆಯಲಿ ಬೆಂದು 

ಬಾಡಿದ ಸುಮ

ಅವಳ ಬೆವರ ಹನಿಗಳ 

ಕನಸುಗಳಲಿ ಹೊದ್ದು 

ಮಲಗುವಷ್ಟಿದೆ ಘಮ...!

ಅವಳ ಪ್ರೀತಿಯೆಂದರೇ, 

ಬೊಗಸೆ ಭರ್ತಿಯಾಗುವಷ್ಟು.

ಸುಕ್ಕೆದ್ದ ಅವಳ ಮೈ ಮೇಲೆ

ಮತ್ತೆ ಮಗುವಾಗಿ ಆಡಬೇಕು..! 

ನಗು ಕಾಯುವ ಜೀವಕ್ಕೆ 

ಎದೆ ತುಂಬಾ ದುಃಖ. 

ಧಗ್ಗೆಂದೆದ್ದ ಒಲೆಯ ಬೆಂಕಿಯ

ಹೊಗೆ ನುಂಗಿದವಳಿಗೆ 

ಎದೆಗೊದೆಯುವ ನೋವೆಲ್ಲಾ 

ಹಿರಿದೇನಲ್ಲ. 

'ಅಮ್ಮ'ನಲ್ಲವೇ, ಅವಳಿಗದು 

ಒಲಿದ ಸಿದ್ಧಿ...!

ಅವಳ ಕೈಗಪ್ಪಿದ 

ಬಳೆಗಳಾಡುವ ಧ್ವನಿ,

ತೂಗಲಾರಂಭಿಸಿದ 

ಕಿವಿಗಳೆರಡರಲ್ಲಿ ಮುಂದೆ ಬಾಗಿ 

ನಿಂತಿರುವ ಬೆಂಡೋಲೆಗಳನು

ನೂರ್ಕಾಲ ಕಂಡು 

ಅವಳ ಹಿಗ್ಗಿದ ಭಾವದಲೆಯ ನೇತ್ರಸಲಿಲದ 

ಒಂದೇ ಒಂದ್ಹನಿ ನಾನಾಗಬೇಕು..!

ಅಮ್ಮನೆಂದರೇ, ಪರ್ಯಾಯವಿಲ್ಲದ 

ಹುಣ್ಣಿಮೆ ಹೊಳಪು...!

-ಕಾವ್ಯ ಬೈರಾಗಿ 

(ಶ್ರೀರಾಜ್ ವಕ್ವಾಡಿ)

📱 : 8762723716