“ಅವ ಈ ಸಲ ಮನಿಗ್ ಬಂದಲ್, ಮನ್ಸಿಗ್ ಚೂರ್ ನೋವ್ ಕೊಟ್ ಹೋಯ್ದಾ..” ಅಪ್ಪಯ್ಯ ಮಾವನ್ ಹತ್ರ ಯಾವ್ ವಿಷ್ಯ ಹೇಳ್ತಿದ್ರ್ ಅಂದೆಳಿ ಗೊತ್ತಾಯಿದ್ದಿತ್ ನಂಗೆ. ಗೊತ್ತಾಯ್ದಿದ್ದರ್ ಕಂಡಂಗೆ ಬಾಯ್ ಮುಚ್ಕಂಡ್ ಇದ್ದಿದಿ.
ಅಮ್ಮ ದಾರಂದಕ್ ಕೈ ಕೊಟ್ಕಂಡ್ ನಿಂತಿದ್ದಿಳ್. ಅಷ್ಟೊತ್ತಿಗೆ ಅವ್ಳ್ ಕಣ್ ಚೂರ್ ಕೆಂಪಾದ್ದೂ ಹೌದ್. ಅಮ್ನಿಗೂ ಆ ವಿಷ್ಯ ಹಂಬ್ಲಿತ್. ಎಷ್ಟಾರೂ ಮಗಂದ್ ವಿಷ್ಯ ಅಲ್ದಾ..! ಮಾತಾಡುಕ್ ಆಯ್ದೆ ಸುಮ್ನಿದ್ದಳ್ ಅಷ್ಟೇ. ಮನಿ ಅಂದ್ರೆ ಹಾಂಗೆ. ಅಬ್ಬಿದಿಕ್ಕಳೆಲ್ಲರೂ ಎಲ್ಲಾ ಗೊತ್ತಿದ್ರೂ ಮನಿತನಕ್ ಮರ್ಯಾದಿ ಕೊಟ್ಕಂಡ್ ಒಂದೊಂದ್ಸಲಿ ಸುಮ್ನಿರ್ಕಾತ್.
ಅದೇನ್ ಮನಿ ಒಡ್ದ್ ಹ್ವಾಪು ವಿಷ್ಯ ಎಂತಲ್ಲ. ಹಳಿಯರಿಗೆಲ್ಲಾ ದೊಡ್ ವಿಷ್ಯ ಅಷ್ಟೇ. ಅಪ್ಪಯ್ಯನ್ ಹತ್ರ ಮನ್ಸಂಗಿದ್ದದ್ ವಿಷ್ಯ ಮನಿಗ್ ಬಂದಲ್ ಹೇಳಿದ್ದಿದಿ. ಬಾಯಿಗ್ ಬಂದಂಗ್ ಬೈದಿರ್. ಮರ್ಕಿದೆ.
ಅಷ್ಟ್ರೊಳಗೆ ಆ ವಿಷ್ಯ ಮನಿ ತುಂಬಾ ಗುಸುಗುಸು ಆತಿದ್ದಿತ್. ಅದ್ ಹ್ಯಾಂಗ್ ಬಾಯಿಂದ್ಬಾಯಿಗ್ ಹ್ವಾದ್ದೋ ಗೊತ್ತಿಲ್ಲ. ಸ್ವಲ್ಪ ದಿನದಂಗೆ ಊರರೆಲ್ಲಾ ಮಾತಾಡ್ಕಂಬುಕ್ ಶುರು ಮಾಡ್ರ್..
“ಅಯ್ಯೋ.. ಪಟೇಲ್ರ್ ಮನಿ ಗಂಡ್ ಯಾವ್ದೋ ಕೆಳ ಜಾತಿ ಹೆಣ್ಣಿನ್ ಲವ್ ಮಾಡ್ತಿದ್ನಂಬ್ರ್”... ಅಂದೆಳಿ. ಅಲಾ..ನಾನ್ ಒಂದ್ ಹೆಣ್ಣಿನ್ ಇಷ್ಟ ಪಡ್ತೆ ಬಿಡ್ತೆ ಅದೆಲ್ಲಾ ಊರವ್ರಿಗ್ ಎಂತಕೆ..? ಲವ್ ಮಾಡದ್ ನಾನ್, ಮನಿಯರನ್ ಬಿಟ್ ಓಡಿ ಹ್ವಾಪುಕ್ ಆಗ ಅಂದೆಳಿ ಅಪ್ಪಯ್ಯನ್ ಮ್ಯಾಲ್ ಗೌರವದಿಂದ ಕೇಂಡಿದಿ. ಅದೆಲ್ಲಾ ಈ ಊರವ್ರಿಗ್ ಎಂತಕೆ..? ಎಂತ ಕೆಳ ಜಾತಿ..? ಅವ್ಳೇನ್ ಹೆಣ್ ಅಲ್ದಾ..? ಮನ್ಸ್ರ್ ಅಲ್ದಾ ಹಂಗಾರೆ..?
ತಪ್ಪೋ ಸರಿಯೋ. ನಾನ್ ಒಬ್ಳನ್ ಇಷ್ಟ ಪಟ್ಟಿದ್ದಿದಿ. ಮನಿ ಬಿಟ್ ಹ್ವಾಪುಕ್ ನಂಗಿಷ್ಟ ಇಲ್ಲ. ಗಟ್ಟೆ ಕೇಂಡ್ರೇ ಆ ಧೈರ್ಯವೂ ನಂಗರ್ಲಿಲ್ಲ. ಬೇರೆ ಜಾತಿ ಹೆಣ್ ಹೌದ್. ಹಂಗಾರೆ ನೀನೆ ಹೇಳ್ ಲವ್ ಮಾಡುದ್ ತಪ್ಪಾ ಅಕ್ಕಾ..?
ಅಕ್ಕ ಬಾಯ್ ತೆರಿಲೇ ಇಲ್ಲ.
ಊರವ್ರಿಗೆಲ್ಲಾ ಹೇಳದ್ ಯಾರಂದಳಿ ಎಣ್ಸ್ಕಂಡಿರಿ..? ನಮ್ಮನಿ ಕೆಲ್ಸಕ್ ಬತ್ತಳಲಾ.. ಗುಲಾಬಿ. ಅಪ್ಪಯ್ಯ ಮನಿ ಮರ್ಯಾದಿ ತೆಗ್ದಳ್ ಅಂದೆಳಿ ಕೆಲ್ಸದಿಂದ್ ಅವ್ಳನ್ ತೆಗ್ದ್ ಹಾಕಿರ್.
ಈ ವಿಷ್ಯದಂಗೆ ರ್ಯಾದಿ ಗರ್ಯಾದಿ ಎಲ್ಲಾ ನಾ ನಂಬುದಿಲ್ಲ ಅಕ್ಕ. ಬೇರೆ ಜಾತಿ ಹೆಣ್ಣಿನ್ ಮದಿ ಆರೆ ಎಂತಾ ಕಡ್ಮಿ ಆತ್..? ಮನಿಯರನ್ ಕೇಣ್ದೆ ಮಾಡ್ದೆ ಮನಿ ಬಿಟ್ ಓಡಿ ಹ್ವಾರಾರೂ ಹೌದ್ ಒಂದ್ ಲೆಕ್ಕಕ್ಕೆ.
ನೀನ್ ಹೇಳೂದು ಸಮನೇ ... ಪ್ರೀತಿ ಜಾತಿ ಕಂಡ್ ಹುಟ್ಟತ್ತಾ..? ನೀನ್ ಇಂಥ ಜಾತಿ..ಇಂಥ ಜಾತಿ ಹೆಣ್ಣಿನೇ ಲವ್ ಮಾಡ್ಕ್ ಅಂದೆಳಿ ಎಲ್ಲಾರೂ ಇತ್ತಾ..? ಇದೆಲ್ಲಾ ಈ ಹಳಿಯರ್ ಮಾಡದ್. ನಿನ್ ಅಪ್ಪಯ್ಯ ಎಲ್ಲಾ ಹಳಿಮಂಡಿ ಅಲ್ದಾ.. ಅವ್ರಿಗೆಲ್ಲಾ ಮನಿ ಮರ್ಯಾದಿ, ಜಾತಿ ಗೀತಿ, ದೇವ್ರ್ ದಿಂಡ್ರ್ ಅಂಬುದೆಲ್ಲಾ ಜಾಸ್ತಿ. ಎಂಥಾ ಹೇಳುಕಾತಿಲ್ಲ ಅವ್ರಿಗೆಲ್ಲಾ. ಅವ್ರ್ ಆಯೇ ತಿಳ್ಕಣ್ಕ್.. ಹಾಂಗಂದೆಳಿ.. ಜಾತಿನ್ ಬಿಟ್ ಹಾಕುದಲ್ಲ... ಜಾತಿಯೂ ಬೇಕ್, ಎಲ್ಲದೂ ಬೇಕ್. ಈ ಲವ್ ಮಾಡುದ್ರಂಗೆಲ್ಲಾ ಎಂತ ಪಾಶಿ ಇಲ್ಲ. ಒಬ್ರಿಗೊಬ್ರ್ ಇಷ್ಟಪಟ್ಟಿರ್ ಅಂದ್ಮೇಲೆ ಅವ್ರ್ ಜೀವನ್ದುದ್ದಕ್ಕೂ ಖುಷಿಯಂಗ್ ಇಪ್ಪುಕೇ ಕಾಂತ್ರ್... ಹಂಗಾರೆ ಲವ್ ಮಾಡಿ ಮನಿಯರ್ ಒಪ್ಪಿಗಿ ಕೇಂಬುದ್ ಎಂಥಕೆ..? ಮನಿಯರೂ ಬೇಕ್, ಎಲ್ಲರೂ ಒಟ್ಟಿಗ್ ಇರ್ಕ್ ಅಂದೆಳಿ ಅಲ್ದಾ..? ಅದನ್ನೆಲ್ಲಾ ದೊಡ್ಡವ್ರ್ ತಿಳ್ಕಣ್ಕ್. ಬರೀ ತಮ್ದೇ ಸಾಧ್ನಿ ಮಾಡ್ತಾ ಆಯ್ಕಂಡ್ರೇ.. ಮರ್ಯಾದಿ ಮಾತ್ರ ಅಲ್ಲ ಎಲ್ಲದೂ ಹರಾಜ್ ಆತ್. ಈಗ ಕಾಣ್ ನನ್ ಅಕ್ಕ.. ಅವ್ಳ್ ಕಾಲೇಜಿಗ್ ಹ್ವಾಪುವತ್ತಿಗೆ ಬೇರೆ ಜಾತಿ ಹುಡ್ಗನ್ ಇಷ್ಟ ಪಟ್ಟಿದ್ದಿದಳ್. ನಮ್ಮನಿ ಅಪ್ಪಯ್ಯನ್ ಹತ್ರ ಬಂದ್ ಕೇಂಡಳ್.. ಮನಿಯರೆಲ್ಲಾ ಸುರಿಗೆ ಬ್ಯಾಡ ಬ್ಯಾಡ ಅಂದ್ರ್... ಅಪ್ಪಯ್ಯ ಕಡಿಗ್ ಆಲೋಚ್ನಿ ಮಾಡಿ, ಅವ್ನನ್ನೂ, ಅವ್ನ್ ಮನಿಯವ್ರನ್ನೂ ಕರ್ಸಿ ಮಾತಾಡಿ ಮದಿ ಮಾಡಿ ಕೊಟ್ರ್. ಈಗ ಸುಖದಂಗ್ ಇಲ್ಯಾ ನನ್ನಕ್ಕ. ಹೀಂಗೆ ಜಾತಿ ಗೀತಿ ಅಂದೇಳಿ ಕಾಂತಾ ಕೂಕಂಡಿರೇ ಆತಿದ್ದಿತಾ..? ಹೊಂದಾಣ್ಕಿ ಅಂಬುದ್ ಬೇಕ್. ಅದ್ ಯಾರಿಗೇ ಆಯ್ಲಿ. ನಮ್ ಅಪ್ಪಯ್ಯ ಅಕ್ಕನ್ ಎಂಥಾ ಶ್ರೀಮಂತ್ರ್ ಮನಿಗ್ ಬೇಕಾರೂ ಮದಿ ಮಾಡಿ ಕೊಡ್ಲಕ್ಕಿದ್ದಿತ್.. ಅಕ್ಕ ಇಷ್ಟ ಪಟ್ಟದ್ ಹುಡ್ಗಂಗೇ ಯಾಕ್ ಮದಿ ಮಾಡಿ ಕೊಟ್ರ್..ಅವ್ನ್ ಮನಿಯವರ್ ನಮ್ಗಿಂತ ದುಡ್ಡಂಗ್ ಕಡ್ಮಿ ಇದ್ರೂ..? ಅಕ್ಕಂಗ್ ಒಳ್ಳೆದಾಯ್ಲಿ, ಅವ್ಳ್ ಮನ್ಸಿಗೂ ನೆಮ್ಮದಿ ಸಿಕ್ಲಿ ಅಂದೆಳಿ. ಅಕ್ಕ ಬೇರೆ ಜಾತಿ ಗಂಡಿನ್ ಇಷ್ಟ ಪಟ್ಟಳ್ ಅಂದೇಳಿ ಆತೇ ಇಲ್ಲ ಅಂದ್ಕಂಡ್ ಕೂಕಂಡಿರೇ.. ಒಂದೇ ಮನಿ ಸುದ್ದಿ ಊರರ್ ಬಾಯಿಗ್ ಬೀಳ್ತಿದ್ದಿತ್, ಅಥವಾ ಅಕ್ಕ ನೇಣ್ ಗೀಣ್ ಹಾಯ್ಕಂತಿದ್ದಿದಳ್ ಅಷ್ಟೇ. ಪವಿತ್ರಕ್ಕ ಪುರ್ಸೋತಿಲ್ದೇ ಹೇಳ್ದಳ್.
ಹೌದ್ ಅಕ್ಕ. ಅದ್ಯಾಕ್ ನಮ್ಮನಿಯಂಗ್ ಹೀಂಗ್ ಮಾಡ್ರ್ ಅಂದೆಳಿ ಇವತ್ತಿಗೂ ಗೊತ್ತಾಯ್ಲ ನಂಗೆ. ‘ನೀನ್ ಅವ್ಳನ್ನೇ ಮದಿ ಆಪುದಾರೇ.. ಆಗ್ ನನ್ನನ್ ಅಪ್ಪಯ್ಯ ಅಂದೆಳಿ ಹೇಳ್ಬೆಡ. ನಾನ್ ಸತ್ರೂ ನನ್ ಹೆಣ ಕಾಂಬುಕ್ ಬರ್ಬೇಡ’ ಅಂದೆಳಿ ಅಪ್ಪಯ್ಯ ಹೇಳ್ರ್.. ಹೀಂಗೆಲ್ಲಾ ಹೇಳುವತಿಗೆ ಎಂಥ ಕಟುಕನ್ ಕಣ್ಣಂಗೂ ನೀರ್ ಬರ್ದೇ ಇರತ್ತಾ ಅಕ್ಕಾ..? ಅಷ್ಟಕ್ಕೂ ನಾನ್ ಅಂತದೆಂತಾ ತಪ್ ಮಾಡಿದಿ..? ಜಾತಿ ಇಲ್ದಿದ್ ಪ್ರೀತಿಯೇ ಅಲ್ದಾ ಹಂಗಾರೆ..? ಜಾತಿ ಇಲ್ದಿದ್ ಪ್ರೀತಿಯೇ ಇಲ್ಯಾ ..?
ಇಷ್ಟ ಪಟ್ ದಿನ ಸಮ್ಸಿಪ್ಪುದಕ್ಕೆ ಈ ಸಮಾಜ ಒಂಚೂರು ಬೆಲಿ ಕೊಡುದಿಲ್ಯಾ..? ಇದೆಲ್ಲಾ ಜಾತಿ, ಧರ್ಮ ಭೇದ ಭಾವ ಏಗಳಿಕ್ ಹ್ವಾಪುದ್..? ನನ್ ಕಣ್ಣಂಗೆ ನೀರ್ ತುಂಬ್ಕಂಡಿದ್ದಿತ್.
ಇಲ್ಕಾಣ್ ಮನು.. ಈ ಜಾತಿ ಧರ್ಮ ಇವೆಲ್ಲಾ ನಮ್ ಬದ್ಕಿಗ್ ಒಂದ್ ಒಳ್ಳೆ ಬೇಲಿ ಹಾಕಕ್ ಹೊರ್ತು.. ಹೀಂಗಿದೆಲ್ಲಾ ಮಾಡುಕಾಗ. ಅಷ್ಟಕ್ಕೂ ನಮ್ ಪ್ರಯೋಜ್ನಕ್ಕೆ ಬಂದಾಗಳಿಕೆ ಎಲ್ಲಾ ಜಾತಿಯರೂ ಬೇಕಾತಿಲ್ಯಾ..? ಅದಕ್ಕೆಲ್ಲಾ ಜಾತಿ ಗೀತಿ ವಿಷ್ಯ ಬತ್ತಿಲ್ಲ ಎಂತಕೆ..? ಈ ಲವ್ ವಿಷ್ಯದಂಗೆ ಮಾತ್ರ ಜಾತಿ, ಧರ್ಮ ಅಂದೆಳಿ ಎಲ್ಲರೂ ಬೊಬ್ಬಿ ಹಾಕುದ್. ಗಟ್ಟೆ ಕೇಂಡ್ರೆ.. ಅವ್ರವ್ರ್ ಜಾತಿಯಂಗೆ ರೂಢಿ ಇಪ್ಪು ಆಚರ್ಣಿ ಯಾರೂ ಪಾಲ್ಸುವವ್ರಿಲ್ಲ..! ಕೇಂಡ್ರೇ ನಮ್ದ್ ಆ ಜಾತಿ, ಹಾಂಗೆ ಹೀಂಗೆ ಅಂತ್ರ್..! ಎಂತ ಮಾಡುಕಿಲ್ಲ. ಇದನ್ನೆಲ್ಲಾ ನಾನ್ ನೀನೂ ಒಬ್ಬ ನನ್ನ ಸ್ವಂತ ತಮ್ಮ ಇದ್ದಂಗೆ ಅಂದೆಳಿ ನಿನ್ ಹತ್ರ ಮಾತ್ರ ಹೇಳ್ಲಕ್. ಎಲ್ಲರ್ ಮುಂದ್ ಹೇಳ್ರೇ.. ನನ್ನನ್ ಬಿಲಾಸ್ ಬಿಟ್ಟವ್ಳ್ ಅಂದೆಳಿ ಹಣಿಪಟ್ಟಿ ಕಟ್ಟತ್ರ್..! ಹೀಂಗಿನ್ ಪರಿಸ್ಥಿತಿಯಂಗ್ ನಾವ್ ಇತ್..! ಸಿಟ್ಟಿನ್ ಬೆಂಕಿ ಪವಿತ್ರಕ್ಕನ್ ಕಣ್ಣಂಗೆ ಹೊಗಿಯಾಡ್ತಿದ್ದಿತ್.
ಹೌದ್.. ಇವತ್ತಿನ್ ದಿನದಂಗೆ ಜಾತಿ ಎಲ್ಲಿಯೊರಿಗ್ ಬೇಕ್ ಅಂದ್ರೆ.. ಹುಟ್ಟಿ ಸತ್ ಆದ್ಮೇಲೂ ಬೇಕ್. ಆರೆ.. ಇಂಥ ವಿಷ್ಯದಂಗೆ ಅಡ್ಡ ಬಂದ್ರೆ ಎರ್ಡ್ ಇಷ್ಟ ಪಟ್ಟದ್ ಮನ್ಸ್ಗಳನ್ ದೂರ ಮಾಡೊಲೊರಿಗೆ ಜಾತಿ ಮುಂದಾಪುಕಾಗ..!
‘ಮನಿಯರನ್ ಕೇಂಡೆ.., ಅಪ್ಪಯ್ಯನ್ ಕೇಂಡೆ.. ಬೇರೆ ಜಾತಿ ಹೆಣ್ ಆರೆ ಮದಿ ಮಾಡ್ಸಿ ಕೊಡುದಿಲ್ಲ, ಹೋಗ್ ಮನಿ ಬಿಟ್ ಹೋಗ್, ಮನಿಗ್ ಕಾಲಿಡ್ಬೇಡ, ಈ ದಿಕ್ಕಿಗ್ ತಲಿ ಹಾಕಿಯೂ ಮನ್ಕಣ್ಬೇಡ, ಇವತ್ತಿಂದ ನಂಗೂ ನಿಂಗೂ ಸಂಬಂಧವೇ ಇಲ್ಲ, ನನ್ನನ್ ಅಪ್ಪಯ್ಯ ಅಂಬುದೂ ಬ್ಯಾಡ, ನಿನ್ ಪಾಲಿಗೆ ನಿನ್ ಅಪ್ಪ ಸತ್ ಹ್ವಾದ ಅಂದ್ಕೊ, ನನ್ ಪಾಲಿಗೂ ನೀನ್ ಇವತ್ ಸತ್ ಹ್ವಾದೆ.. ಹೋಗ್ ಹಿಂತಿರ್ಗಿ ಕಾಣ್ಬೇಡ’ ಅಂದಾಗಳಿಕೆ.. ಎಷ್ಟ್ ಸಲ ಬೇಡ್ಕಂಬುದ್..? ಇಷ್ಟ ಪಟ್ಟದ್ ಒಂದ್ ಹೆಣ್ಣಿನ್. ಅವ್ಳನ್ ದಾರಿ ಮ್ಯಾಲ್ ಹಾಕುದಾ..? ಮನ್ಸ್ ಒಪ್ಲಿಲ್ಲ. ಮನಿಯಿಂದ ಹೊರ್ಗ್ ಬರ್ಕಾಯ್ತ್..! ಊರವ್ರ್ ಬಾಯಿಂಗ್ ಬಂದಂಗ್ ನನ್ ಬಗ್ಗೆ ಮಾತಾಡ್ಕಂಡ್ರ್. ಅಪ್ಪಯ್ಯ, ಅಮ್ಮನ್ಗಿಂತ ಆ ಹೆಣ್ಣೇ ಜಾಸ್ತಿ ಆಯ್ತ್. ಸೊಕ್ಕ್.. ಲವ್ ಮಾಡಿ ಓಡಿ ಹ್ವಾದ... ಮನಿಯರ್ ಮನ್ಸಿಗ್ ಆದ್ದ್ ನೋವ್, ಶಾಪ ಆಯ್ದೆ ಇರತ್ತಾ..? ಎಲ್ಲದನ್ನೂ ತಮ್ಗ್ ಇಷ್ಟ ಬಂದಂಗ್ ಮಾತಾಡ್ಕಂಡ್ರ್. ನಂಗ್ ಸತ್ತಿಕೂ ಮನಿಯವ್ರನ್ ಬಿಟ್ ಮದಿ ಆಪುಕೆ ಇಷ್ಟ ಇರ್ಲಿಲ್ಲ. ಅದ್ ನನ್ ಹೆಂಡ್ತಿಗೂ ಇದ್ದಿರ್ಲಿಲ್ಲ. ಅವ್ಳೂ ಲವ್ ಮಾಡುವತಿಗ್ ಹೇಳಿದಳ್..ನಮ್ಮಿಬ್ರದ್ ಬೇರೆ ಜಾತಿ, ನಾವ್ ಓಡಿ ಹೋಯ್ ಮದಿ ಆಪುದ್ ಬ್ಯಾಡ. ಮನಿಯರನ್ ಒಪ್ಸಿಯೇ ಮದಿ ಆಪ ಅಂದೆಳಿ. ಆರೆ... ಮನಿಯರನ್ ಕೇಂಬುಕ್ ಹ್ವಾದಲ್ ಎಲ್ಲಾ ಉಲ್ಟಾ ಆಯ್ತ್. ಅವ್ಳ್ ಮನಿಯಂಗೂ ಒಪ್ಲಿಲ್ಲ. ನಮ್ ಮನಿಯಂಗೂ ಒಪ್ಲಿಲ್ಲ. ಪ್ರೀತಿನ್ ಹುಟ್ಸದ್ ದೇವ್ರ್ ... ಏನಾರೂ ದಾರಿ ಮಾಡಿ ಕೊಡ್ತಾ ಅಂದೆಳಿ ಮನಿ ಬಿಟ್ ಬಂತ್. ಬೇಕಾದಷ್ಟ್ ಕಷ್ಟ ಸಹಿಸ್ಕಂತ್. ಯಾರಿಗ್ ಕಷ್ಟ ಹೇಳುದ್..? ನಂಗ್ ಅವ್ಳ್ ಹೇಳ್ಕ್, ನಾನ್ ಅವ್ಳಿಗ್ ಹೇಳ್ಕ್ ಅಷ್ಟೇ. ಈಗ ಏನೋ ಒಂದ್ ಮಟ್ಟಿಗೆ ಬಂದ್ ನಿಂತಿತ್. ಯಾರ್ ಮನಿಯಿಂದ ಹೆರ್ಗ್ ಹಾಕ್ರೋ... ಅವ್ರೇ ಬಾ ಮಗ ಅಂದೆಳಿ ಮನಿಗ್ ಕರ್ಕಂಡಿರ್. ‘ಅವ್ರಿಗ್ ಈಗ ಕಷ್ಟದ್ ಕಾಲ್ವೇನೋ..ನಾನ್ ಬೇಕಾದೆ’ ಅಂದೆಳಿ ನಾನ್ ಹೇಳುದಿಲ್ಲ.
ಒಪ್ಕಂಡ್ ಕರ್ದಿರ್ ಅಂದ್ಕಂಡ್ ಖುಷಿ ಪಟ್ಟಿದೆ. ಇದ್ರಂಗೆ ನಂಗೆಲ್ಲೂ ಸ್ವಾಭಿಮಾನ ಕಾಡ್ಲಿಲ್ಲ. ತಪ್ಪಾಯಿಪ್ಪುಕು ಸಾಕ್. ಅದ್ ಆಪುದಕ್ಕೆ ಇಪ್ಪುದ್. ನನ್ನಿಂದಲೋ, ಅವ್ರಿಂದಲೋ ಗೊತ್ತಿಲ್ಲ. ಎಲ್ಲದಕ್ಕೂ ‘ಜಾತಿ’ ಇಷ್ಟೆಲ್ಲಾ ಮಾಡ್ತ್. ಬೇರೇನೂ ನಾನ್ ನನ್ ಮನಿಯವ್ರಿಗ್ ಉಲ್ಟಾ ನೆಡ್ಕಂಡವ್ನ್ ಅಲ್ಲ. ಈ ವಿಷ್ಯದಂಗೂ ನಾನ್ ಕೇಂಬಷ್ಟ್ ಕೇಂಡೆ, ಆಯ್ಲಿಲ್ಲ. ಇಷ್ಟೇಲ್ಲಾ ಆಯ್ಕ್ ಅಂದೆಳಿ ಇದ್ದಿತೆನೋ ಆಯ್ತ್. ಈಗ ನನ್ ಮನಿಯವ್ರೂ, ಅವ್ಳ್ ಮನಿಯವ್ರೂ ಒಳ್ಳೆ ರೀತಿಯಂಗ್ ಯಾವ್ದೇ ಬೇಜಾರಿಲ್ದೆ ಇತ್. ಎನೋ ಒಂಥರಾ ಖುಷಿ ಇತ್ ಮನ್ಸಿಗೆ. ಒಪ್ಕಂಡಿರಲಾ ಅಂದೆಳಿ.
‘ಇಂತದ್ದೊಂದಿನ ಬತತ್ ಅಂದೆಳಿ ಕನ್ಸಂಗೂ ಅಂದ್ಕಂಡರ್ಲಿಲ್ಲ'. ಖುಷಿ, ದುಃಖ ಎಲ್ಲಾ ಒಟ್ಟೊಟ್ಟಿಗೆ ಬಂದ್ ಕಣ್ಣಿಂದ ನೀರ್ ಜಾರ್ತ್. ಪವಿತ್ರಕ್ಕನ್ ಮುಖ ಸಣ್ಣದಾಯಿದ್ದಿತ್.
ಮನು..ವಾ…, ನಾನ್ ಎಂಥಾ ಹೇಳುದಾ...? ಒಬ್ಬೊಬ್ರಿಗ್ ಒಂದೊಂದ್ನಮ್ನಿ ಕಾಲ, ಬದ್ಕ್, ಸುಖ, ದುಃಖ. ಎಲ್ಲದನ್ನೂ ಒಪ್ಕಂಡ್ ಮುಂದ್ ಹೋಯ್ಕ್ ಅಷ್ಟೇ.
ಪ್ರೀತಿಯ ‘ಪ್ರೀತಿ’ಯೇ
ಜಾತಿ ನಿಂದಲ್ಲ
ನಿಂಗೆ ಜಾತಿಯೇ ಇಲ್ಲ.
ನೀನಂದ್ರೆ ದುಃಖ. ಕೊನೆಗೊಂದಿಷ್ಟ್ ಮುಷ್ಟಿ ಗಾತ್ರದ್ ಖುಷಿ.
ಅಷ್ಟೇ.
-ಕಾವ್ಯ ಬೈರಾಗಿ
No comments:
Post a Comment