ನಾಯಕನ ಪಾತ್ರಕ್ಕೂ ಸೈ, ಪ್ರತಿನಾಯಕನ ಪಾತ್ರಕ್ಕೂ ಜೈ 'ಯಕ್ಷ ತಾರಾ ಶಶಾಂಕ'

ಸರ್ವಾಂಗ ಸುಂದರ ಕಲೆಗೆ ಮತ್ತೊಂದು ಹೆಸರೇ ಯಕ್ಷಗಾನ. ಹುಟ್ಟಿನಿಂದಲೇ ಯಕ್ಷರಂಗದ ಸ್ಪರ್ಶ ಹೊಂದಿದ ಶಶಾಂಕ್ ಪಟೇಲ್,  ಯಕ್ಷಗಾನಕ್ಕೆ ಬಹು ಭರವಸೆಯ ಸ್ವತ್ತು ಎನ್ನುವುದರಲ್ಲಿ ಏನೂ ಅತಿಶಯೋಕ್ತಿಯಿಲ್ಲ. ಬಡಾಬಡಗು ತಿಟ್ಟಿನ ಶಾಸ್ತ್ರೀಯ ಹೆಜ್ಜೆಗಾರಿಕೆ ಮತ್ತು ಸುಂದರ ಅಭಿವ್ಯಕ್ತಿ ಹೊಂದಿರುವ  ಪಟೇಲರಿಗೆ ಕರ್ನಾಟಕ ಬಯಲಾಟ ಅಕಾಡೆಮಿ 'ಉದಯೋನ್ಮುಖ ಯಕ್ಷಗಾನ ಯುವ ಪ್ರತಿಭೆ' ಪ್ರಶಸ್ತಿ ನೀಡಿ ಗೌರವಿಸಿರುವುದನ್ನು ಒಳಗೊಂಡು 'ಯಕ್ಷ ತಾರಾ ಶಶಾಂಕ' ಎಂಬಿತ್ಯಾದಿ ಸನ್ಮಾನ,  ಗೌರವ ದೊರಕಿರುವುದು ಹೆಮ್ಮೆ. ಯಕ್ಷಗಾನದ ತಿಟ್ಟು ದ್ವಯಗಳಿಗೂ ಮೇರು ಕಲಾವಿದರನ್ನು ಕೊಟ್ಟ ಮಲೆನಾಡು, ಪಟೇಲರ ಹುಟ್ಟೂರಾದರೇ, ಕಾರ್ಯಕ್ಷೇತ್ರ ಉಡುಪಿ. ವೃತ್ತಿಪರ ಆಂಗ್ಲ ಭಾಷಾ ಉಪನ್ಯಾಸಕರಾಗಿ, ಪ್ರವೃತ್ತಿಪರ ಯಕ್ಷಗಾನ ಕಲಾವಿದರಾಗಿ ಕಾರ್ಯನಿರ್ವಹಿಸುತ್ತಿರುವ ಶಶಾಂಕ್ ಪಟೇಲರ ಕಿರು ಸಂದರ್ಶನ ನಿಮಗಾಗಿ...

ನಿಮ್ಮೊಂದಿಗೆ ಯಕ್ಷಗಾನ ಸೇರಿಕೊಂಡಿದ್ದು ಹೇಗೆ...? ಸ್ಫೂರ್ತಿ ..?
ಬಾಲ್ಯದಿಂದಲೂ ಮನೆಯ ವಾತಾವರಣದಿಂದ ಯಕ್ಷಗಾನ ಉಸಿರಂತೆ ಬೆರೆತಿತು. ನಮ್ಮ ಮನೆಯ 'ಸಾಕೇತ ಕಲಾವಿದರು' ಯಕ್ಷಗಾನ ತಂಡ ನನಗೆ ಸ್ಫೂರ್ತಿ.

ಹಲವು ಮೇಳಗಳ, ಮೇರು ಕಲಾವಿದರ ಸಂಸರ್ಗ ನಿಮಗಿದೆ ...ಅದರ ಅನುಭವ ಹೇಗಿದೆ...?
ಯಕ್ಷಗಾನ ಹೆಜ್ಜೆ ಕಲಿತು ನಾನು ನಮ್ಮ ಸಾಕೇತ ತಂಡದಿಂದ ಹೊರಗೆ ಪಾತ್ರ ವಹಿಸುವುದಕ್ಕೆ ಆರಂಭಿಸಿದ್ದು 2011ರಲ್ಲಿ. ಬೇರೆ ಬೇರೆ  ಮೇಳಗಳ ಅನೇಕ ಹಿರಿ, ಕಿರಿಯ ಕಲಾವಿದರ ಒಡನಾಟದಿಂದ ನಾನು ಕಲಿತದ್ದು ಅನೇಕ.ನನಗೆ ಮಾರ್ಗದರ್ಶನವಿತ್ತ, ಈಯುತ್ತಿರುವ ಎಷ್ಟೋ ಕಲಾವಿದರನ್ನು ಇಂದಿಗೂ, ಎಂದಿಗೂ ಸ್ಮರಿಸುತ್ತೇನೆ.

ನೀವು ಯಕ್ಷಗಾನದಲ್ಲಿ ಬಹುಶಃ ಸ್ತ್ರೀ ವೇಷವನ್ನು ಹೊರತಾಗಿ ಬಹುತೇಕ ಎಲ್ಲಾ ವೇಷಗಳಿಗೆ ಪಾತ್ರರಾದವರು. ಒಬ್ಬ ಕಲಾವಿದ ಎಲ್ಲಾ ರೀತಿಯ ಪಾತ್ರಗಳಿಗೆ ತೊಡಗಿಕೊಳ್ಳುವುದಕ್ಕೆ ಹೇಗೆ ಸಾಧ್ಯ..?
ನಿರ್ವಹಿಸದಿರುವ ಪಾತ್ರಗಳೇ ಹೆಚ್ಚಿದ್ದರೂ ದೇವರ ಕೃಪೆಯಿಂದ ಅನೇಕ ಪಾತ್ರಗಳನ್ನು ನಿರ್ವಹಿಸುವ ಭಾಗ್ಯ ನನ್ನದಾಗಿದೆ. ಪಾತ್ರದಿಂದ ಪಾತ್ರಕ್ಕೆ ಬಹಳ ವ್ಯತ್ಯಾಸ ಇರುತ್ತದೆ.ಎಲ್ಲಾ ರೀತಿಯ ಪಾತ್ರಗಳನ್ನು ನಿರ್ವಹಿಸುವುದು ಒಬ್ಬ ಕಲಾವಿದನಿಗೆ ಸವಾಲಿನ ಕೆಲಸವೇ ಹೌದು. ಸುಧನ್ವಾರ್ಜುನದ ಅರ್ಜುನ, ಸುಧನ್ವ, ಶರಸೇತುವಿನ ಅರ್ಜುನ, ಹನುಮಂತ, ಕಾರ್ತವೀರ್ಯಾರ್ಜುನದ  ರಾವಣ, ಕಾರ್ತವೀರ್ಯ, ಕೃಷ್ಣಾರ್ಜುನದ ಅರ್ಜುನ, ಕೃಷ್ಣ, ಗದಾಯುದ್ಧದ ಭೀಮ, ಕೌರವ ಇತ್ಯಾದಿ. ಹೀಗೆ ಒಂದೇ ಪ್ರಸಂಖದ ನಾಯಕ, ಪ್ರತಿನಾಯಕ ಪಾತ್ರಗಳನ್ನು ನಿರ್ವಹಿಸಿ ಅದರ ಸವಾಲನ್ನು ಎದುರಿಸಿದ್ದೇನೆ.

ಯಕ್ಷಗಾನದಲ್ಲಿ ಶಾಸ್ತ್ರೀಯತೆಯ ಪ್ರಶ್ನೆ ನಿಮ್ಮನ್ನು ಹೇಗೆ ಕಾಡುತ್ತದೆ...?
ಪಾತ್ರ ಪೋಷಣೆಯಲ್ಲಿ, ಕುಣಿತದಲ್ಲಿ, ಅಭಿನಯದಲ್ಲಿ ಮಾತುಗಾರಿಕೆಯಲ್ಲಿ,ವೇಷಭೂಷಣದಲ್ಲಿ, ರಂಗಚಲನೆಯಲ್ಲಿ ಶಾಸ್ತ್ರೀಯತೆ ಬಹಳ ಮುಖ್ಯ. ರಂಗದಲ್ಲಿ ನನಗೆ ಸಾಧ್ಯವಾದಷ್ಟು ಪಾತ್ರದ ಚೌಕಟ್ಟಿನಲ್ಲೇ ವ್ಯವಹರಿಸುತ್ತೇನೆ. ಅದು ಎಲ್ಲೋ ಒಮ್ಮೊಮ್ಮೆ ತಪ್ಪಿದಾಗ ತಪ್ಪು ಎನಿಸುತ್ತದೆ.

ಹಿಮ್ಮೆಳದೊಂದಿಗೆ ಮುಮ್ಮೇಳಕ್ಕೆ ಸಾಮರಸ್ಯ ಎಷ್ಟು ಮುಖ್ಯ..?
ಹಿಮ್ಮೇಳ ಮುಮ್ಮೇಳಕ್ಕೆ ಸಾಮರಸ್ಯ ಇದ್ದರೆ ಮಾತ್ರ ಅದು ಚಂದ ಆಗುತ್ತದೆ. ಇಲ್ಲದಿದ್ದರೆ ಅಭಾಸ ಎನಿಸುತ್ತದೆ.

ಮೇಳಗಳಲ್ಲಿ ಅತಿಥಿ ಕಲಾವಿದನಾಗಿ ಭಾಗವಹಿಸುವಾಗ ಸವಾಲುಗಳೇನು...?
ಮೇಳಗಳಲ್ಲಿ ನಿತ್ಯ ಅವರದೇ ಆದ ಸೆಟ್ಟಿಂಗ್ ಇರುತ್ತದೆ.(ಪೌರಾಣಿಕ ಆಖ್ಯಾನಗಳಿಗೂ). ಅದಕ್ಕೆ ಅತಿಥಿ ಎನಿಸಿಕೊಂಡು ಒಂದೊಂದು ದಿನ ಹೋಗಿ ವೇಷ ಮಾಡುವುದು ದೊಡ್ಡ ಸವಾಲು.

ಕಲಾವಿದ ನೋಡುಗರ ನಿರೀಕ್ಷೆಗಳಿಗೆ ಎದುರಾಗುವುದಕ್ಕೆ ಹೇಗೆ ಪೂರ್ವ ತಯಾರಿ ಮಾಡಿಕೊಳ್ಳಬೇಕು..?
ಯಾವುದೋ ಒಂದು ನಿರೀಕ್ಷೆ ಇರಿಸಿ ನಮ್ಮನ್ನು ವೇಷಕ್ಕೆ ಕರೆಸಿಕೊಂಡಾಗ, ಏಕಾಏಕಿ ಯಾವ ತಯಾರಿಯೂ ಇಲ್ಲದೇ ಹೋಗಿ ವೇಷ ಮಾಡುವುದು ಒಂದುರೀತಿಯ ಉದ್ಧಟತನವೇ. ಹಾಗಾಗಿ ಯಾವುದೇ ಪಾತ್ರ ನಿರ್ವಹಿಸುವಾಗ ಪೂರ್ವತಯಾರಿ ಅತಿ ಮುಖ್ಯ.

 ಹಲವಾರು ಸಂಘ, ಸಂಸ್ಥೆಗಳು ನಿಮ್ಮನ್ನು ಗುರುತಿಸಿ ಗೌರವಿಸಿದೆ ಆ ಬಗ್ಗೆ ಹೇಳುವುದಾದರೆ...
ಗೌರವ ಎನ್ನುವುದಕ್ಕಿಂತ,ಕಲಾವಿದನಾಗಿ ಗುರುರುತಿಸಲ್ಪಟ್ಟಿದ್ದೇನೆ,ಅದರಿಂದ ನನ್ನ ಗೌರವ ಇಮ್ಮಡಿಯಾಗಿದೆ. ಹಾಗಂತ ಏನೂ ಕೃಷಿ ಇಲ್ಲದೇ ಯಕ್ಷಗಾನಕ್ಕೆ ಬಂದವನಲ್ಲ ನಾನು ಎನ್ನುವ ವಿಶ್ವಾಸ ನನ್ನಲ್ಲಿದೆ.

ವೃತ್ತಿಯಲ್ಲಿ ನೀವು ಆಂಗ್ಲ ಭಾಷೆಯ ಉಪನ್ಯಾಸಕರು. ಪ್ರವೃತ್ತಿಯಲ್ಲಿ ಕಲಾವಿದರು. ವೃತ್ತಿ, ಪ್ರವೃತ್ತಿಗಳ ಸವಾಲುಗಳನ್ನು ಹೇಗೆ ನಿಭಾಯಿಸುತ್ತೀರಿ..?
ಅದು ಒಂದು ರೀತಿ ನನ್ನ ರುಟೀನ್ ಆಗಿಬಿಟ್ಟಿದೆ.ಅದರಿಂದ ತೊಂದರೆ ಮಾಡಿಕೊಳ್ಳದಿರುವುದೇ ನನ್ನ ಪ್ರಯತ್ನ.ವೃತ್ತಿ ಪ್ರವೃತ್ತಿ ಎರಡೂ ಕೂಡ ನನ್ನ ಜೀವನದಲ್ಲಿ ಪ್ರಮುಖವಾದದ್ದು. ಹಾಗಾಗಿ ಎರಡನ್ನೂ ಬಹಳ ಪ್ರೀತಿಸುತ್ತೇನೆ. ಮತ್ತೆ, ವೃತ್ತಿಯಿಂದ ಪ್ರವೃತ್ತಿಗೆ, ಪ್ರವೃತ್ತಿಯಿಂದ ವೃತ್ತಿಗೆ ಒಂದಕ್ಕೊಂದು ಬಹಳ ಸಹಕಾರಿ ನನ್ನ ಪಾಲಿಗೆ.

ಒಟ್ಟಾರೆಯಾಗಿ ಯಕ್ಷಗಾನದ ಬಗ್ಗೆ ನಿಮ್ಮ ಅಭಿಪ್ರಾಯ..?
ಇಂದು ಮನೆಮನೆಗಳಲ್ಲೂ ಯಕ್ಷಗಾನದ ಕಂಪು ಪಸರಿಸಿದೆ. ಇದು ಯಕ್ಷಗಾನದ ದೃಷ್ಟಿಯಿಂದ ಸಂತೋಷದ ಬೆಳವಣಿಗೆ.ಆದರೆ ಪ್ರತಿಯೊಬ್ಬ ಕಲಾವಿದನಾಗಲು ಬಯಸುವವ ಅದರ ಮೂಲಭೂತ ಕಲಿಕೆಗಳನ್ನ(basic essence) ಇಟ್ಟುಕೊಂಡು ಅಭ್ಯಸಿಸಿದರೆ ಅದು ಯಕ್ಷಗಾನಕ್ಕೂ, ಸಮಾಜಕ್ಕೂ ಹಾಗೂ ಮುಂದಿನ ಪೀಳಿಗೆಯವರಿಗೂ ಆರೋಗ್ಯಕರವಾಗಿರುತ್ತದೆ. ಹಾಗೇ ಯಕ್ಷಗಾನ ಕಲೆ ದೇಶವ್ಯಾಪಿಯಾಗಬೇಕು ಎಂಬುದು ನನ್ನ ಆಶಯ.

- ಶ್ರೀರಾಜ್ ವಕ್ವಾಡಿ