ಅಹಿಂದ ಅಸಮಾಧಾನ ಕಾಂಗ್ರೆಸ್ ಗೆ ಮರಣಶಾಸನ ?

ಕರ್ನಾಟಕ ರಾಜಕಾರಣದಲ್ಲಿ 'ಅಹಿಂದ' (ಅಲ್ಪಸಂಖ್ಯಾತ, ಹಿಂದುಳಿದ ವರ್ಗ, ದಲಿತ) ಎನ್ನುವುದು ಕೇವಲ ಒಂದು ರಾಜಕೀಯ  ಸಮೀಕರಣವಲ್ಲ, ಅದು ಕಾಂಗ್ರೆಸ್ ಪಾಲಿಗೆ ಭದ್ರಕೋಟೆ. ಸಿದ್ದರಾಮಯ್ಯ ಮತ್ತು ಕಾಂಗ್ರೆಸ್ ಪಕ್ಷದ ಅಧಿಕಾರದ ಅಡಿಪಾಯವೇ ʼಅಹಿಂದʼ. ಆದರೆ, ಇತ್ತೀಚಿನ ರಾಜಕೀಯ ಬೆಳವಣಿಗೆಗಳು ಮತ್ತು ಡಿ.ಕೆ. ಶಿವಕುಮಾರ್ ತಮ್ಮ ʼಅಧಿಕಾರದ ಪರಮಾವಧಿʼಯನ್ನು ಬಳಸುತ್ತಿರುವುದನ್ನು ಗಮನಿಸಿದರೆ, ಮುಖ್ಯಮಂತ್ರಿ ಗಾದಿಯ ಮೇಲೆ ಕಣ್ಣಿಟ್ಟಿರುವ ಅವರು ಈ ಅಹಿಂದ ಮತಬ್ಯಾಂಕ್ ಅನ್ನು ಚದುರಿಸುತ್ತಿದ್ದಾರೆಯೇ ಎನ್ನುವ ಚರ್ಚೆ ಮುನ್ನೆಲೆಗೆ ತರುತ್ತದೆ. 

ಕರ್ನಾಟಕ ಕಾಂಗ್ರೆಸ್ನಲ್ಲಿ 'ಸಿದ್ದರಾಮಯ್ಯ ವರ್ಸಸ್ ಡಿ.ಕೆ. ಶಿವಕುಮಾರ್' ನಡುವಿನ ಶೀತಲ ಸಮರ ಹೊಸದೇನಲ್ಲ. ಆದರೆ, ಈ ʼಅಧಿಕಾರದ ಹೋರಾಟʼ ಈಗ ವ್ಯಕ್ತಿಗತ ಮಟ್ಟದಿಂದ ಸಮುದಾಯಗಳ ಮಟ್ಟಕ್ಕೆ ವಿಸ್ತರಿಸಿದಂತೆ ಕಾಣುತ್ತಿದೆ. ಸಿದ್ದರಾಮಯ್ಯನವರ ಅಹಿಂದ ಬಲವನ್ನು ದುರ್ಬಲಗೊಳಿಸದೆ ತಾನು ಮುಖ್ಯಮಂತ್ರಿಯಾಗುವುದು ಅಸಾಧ್ಯ ಎನ್ನುವುದು ಶಿವಕುಮಾರ್ ಅವರಿಗೆ ಚೆನ್ನಾಗಿ ತಿಳಿದಿದಂತಿದೆ. 

ಡಿಕೆಶಿ ಮಾಡುತ್ತಿರುವ ಈ ಯತ್ನಗಳೆಲ್ಲಾ ಸಿದ್ದರಾಮಯ್ಯ ಅವರು ಅಹಿಂದ ವರ್ಗದ ಏಕೈಕ ಮತ್ತು ಪ್ರಶ್ನಾತೀತ ನಾಯಕ ಎಂಬ ಬಿಂಬಿತ ಚಿತ್ರಣವನ್ನು ಬದಲಿಸಲು ಮಾಡುತ್ತಿರುವಂತೆಯೂ ಕಾಣಿಸುತ್ತಿಲ್ಲ. ಮುಖ್ಯಮಂತ್ರಿ ಹುದ್ದೆಯನ್ನು ದಕ್ಕಿಸಿಕೊಳ್ಳುವುದಕ್ಕೆ ಸಾಧ್ಯವಾಗದೆ ಹತಾಶರಾಗಿ ಈ ರೀತಿಯಲ್ಲಿ ತಮ್ಮ ಅಧಿಕಾರವನ್ನು ಬಳಸಿಕೊಳ್ಳುತ್ತಿದ್ದಾರೆಯೇ ಎನ್ನುವ ಪ್ರಶ್ನೆ ಸಹಜವಾಗಿ ಮೂಡುತ್ತಿದೆ. ಡಿಕೆಶಿ ಇತ್ತೀಚೆಗೆ ನಡೆದುಕೊಂಡ ರೀತಿ ಅಹಿಂದ ವರ್ಗಗಳ ಇತರ ಪ್ರಭಾವಿ ನಾಯಕರನ್ನು (ಉದಾಹರಣೆಗೆ ಜಿ. ಪರಮೇಶ್ವರ್, ಸತೀಶ್ ಜಾರಕಿಹೊಳಿ) ವಿಶ್ವಾಸಕ್ಕೆ ಪಡೆಯುವ ಮೂಲಕ, ಅಹಿಂದ ಎನ್ನುವುದು ಕೇವಲ ಒಬ್ಬ ವ್ಯಕ್ತಿಯ ಸ್ವತ್ತಲ್ಲ ಎನ್ನುವುದನ್ನು ಸಾಬೀತುಪಡಿಸಲು ಹೊರಟಂತೆಯೂ ಕಾಣಿಸುತ್ತಿಲ್ಲ. ಬದಲಾಗಿ, ಅಹಿಂದವನ್ನು ಚದುರಿಸಿ ಪಕ್ಷದಿಂದ ವಿಮುಖರಾಗುವ ಹಾಗೆ ಮಾಡುತ್ತಿದ್ದಾರಾ? ಬಹುಶಃ ಕಾಂಗ್ರೆಸ್ ಮುಂದೊಂದು ದಿನ ಇದೇ ಕಾರಣದಿಂದ ಪಕ್ಷ ಅಧಿಕಾರದಿಂದ ಹೊರಗುಳಿಯುವಂತೆ ಮಾಡಬಹುದು, ಮತ್ತದಕ್ಕೆ ನೇರವಾಗಿ ಡಿಕೆಶಿ ಹೊಣೆಯಾಗುತ್ತಾರೆಯಲ್ಲವೇ? ಆಗ ʼಪಕ್ಷದ್ರೋಹʼದ ಹೆಸರಿನಲ್ಲಿ ಡಿಕೆಶಿ ಮೇಲೆ ಶಿಸ್ತು ಕ್ರಮವನ್ನು ತೆಗೆದುಕೊಳ್ಳುವ ಎದೆಗಾರಿಕೆ ತೋರಿಸುತ್ತದೆಯೇ ಎಂಬ ಪ್ರಶ್ನಗೆ ಉತ್ತರ ಅಸ್ಪಷ್ಟವಾಗಿಯೇ ಗೋಚರಿಸುತ್ತಿದೆ. 

ಡಿ.ಕೆ. ಶಿವಕುಮಾರ್ ಅವರು ಪ್ರಬಲ ಒಕ್ಕಲಿಗ ಸಮುದಾಯದ ನಾಯಕ. ಅಹಿಂದ ವರ್ಗಗಳು ಮತ್ತು ಪ್ರಬಲ ಸಮುದಾಯಗಳ (ಲಿಂಗಾಯತ/ಒಕ್ಕಲಿಗ) ನಡುವೆ ಒಂದು ಸಣ್ಣ ರಾಜಕೀಯ ಸಂಘರ್ಷ ಇದೆ. ಶಿವಕುಮಾರ್ ಅವರು ತಮಗೆ ಒಕ್ಕಲಿಗ ಬೆಂಬಲವಿದೆ ಎಂಬುದನ್ನು ಪದೇ ಪದೇ ತೋರಿಸಿಕೊಳ್ಳುವ ಮೂಲಕ ಸಿದ್ದರಾಮಯ್ಯನವರ 'ಅಹಿಂದ ಸಿದ್ಧಾಂತ'ಕ್ಕೆ ಸವಾಲು ಹಾಕುತ್ತಿದ್ದಾರೆ. ಅಲ್ಪ ಸಂಖ್ಯಾತ ನಾಯಕರ ಮೇಲೆ ಡಿಕೆಶಿ ಪಕ್ಷದ ಪಿಸಿಸಿ ಅಧ್ಯಕ್ಷರಾಗಿ ತೆಗೆದುಕೊಂಡ ಕ್ರಮಗಳು ಅದರ ಮುಂದುವರಿದ ಭಾಗ ಎನ್ನುವಂತೆ ಕಾಣಿಸುತ್ತಿದೆ. 

ಇನ್ನು, ಮೇ ತಿಂಗಳಿನಲ್ಲಿ ಆಗಲಿದೆ ಎಂದು ಹೇಳಲಾಗುತ್ತಿರುವ ಸಚಿವ ಸಂಪುಟ ವಿಸ್ತರಣೆ/ಬದಲಾವಣೆಯಲ್ಲಿ ಸಿದ್ದರಾಮಯ್ಯ ಅವರ ಆಪ್ತ ಬಳಗದಲ್ಲಿ ಗುರುತಿಸಿಕೊಂಡಿರುವ ಅಹಿಂದ ವರ್ಗದ ನಾಯಕರನ್ನು ಬಿಟ್ಟು, ಉಳಿದ ಕೆಲವು ಅಹಿಂದ ರಾಜಕೀಯ ಮುಖಗಳಿಗೆ ಪ್ರೋತ್ಸಾಹಿಸುವ ಮೂಲಕ ಸಿದ್ದರಾಮಯ್ಯನವರ ಹಿಡಿತವನ್ನು ಸಡಿಲಗೊಳಿಸಿ, ಹೈಕಮಾಂಡ್ ಮಟ್ಟದಲ್ಲಿ ಅಹಿಂದ ವರ್ಗದ ಮತಗಳು ಕೇವಲ ಸಿದ್ದರಾಮಯ್ಯನವರಿಂದಲೇ ಬಂದಿದ್ದಲ್ಲ, ಸಂಘಟನಾತ್ಮಕವಾಗಿ ಬಂದಿದ್ದು ಎಂದು ಬಿಂಬಿಸುವುದು ಡಿಕೆಶಿ ಅವರ ಮೊದಲ ತಂತ್ರ. ಅಹಿಂದ ವರ್ಗದ ಜನರಿಗೆ ನೇರವಾಗಿ ತಲುಪಿರುವುದು ಸಿದ್ದರಾಮಯ್ಯ ನೇತೃತ್ವದ ಸರ್ಕಾರದ ಗ್ಯಾರಂಟಿ ಯೋಜನೆಗಳು. ಈ ಯೋಜನೆಗಳ ಯಶಸ್ಸಿನ ಪಾಲನ್ನು ಪಡೆಯಲು ಡಿ.ಕೆ. ಶಿವಕುಮಾರ್ ಅವರು ಕೆಪಿಸಿಸಿ ಅಧ್ಯಕ್ಷರಾಗಿ ನಿರಂತರ ಶ್ರಮಿಸುತ್ತಿದ್ದಾರೆ. "ಸಿದ್ದರಾಮಯ್ಯನವರ ಸಿದ್ಧಾಂತಕ್ಕಿಂತ ಪಕ್ಷದ ಸಂಘಟನೆ ಮುಖ್ಯ" ಎಂಬ ಸಂದೇಶವನ್ನು ಅಹಿಂದ ಮತದಾರರಿಗೆ ತಲುಪಿಸಲು ಅವರು ಪ್ರಯತ್ನಿಸುತ್ತಿರುವುದು ಎರಡನೇ ತಂತ್ರ ಎಂಬಂತೆ ಭಾಸವಾಗುತ್ತಿದೆ. ಆದರೆ, ʼಅಹಿಂದʼ ಮತದಾರರು ಭಾವನಾತ್ಮಕವಾಗಿ ಸಿದ್ದರಾಮಯ್ಯನವರಿಗೆ ಹತ್ತಿರವಾಗಿದ್ದಾರೆ. ಈ ಭಾವನಾತ್ಮಕ ಬೆಸುಗೆಯನ್ನು ಶಿವಕುಮಾರ್ ಅವರು ಕೇವಲ ರಾಜಕೀಯ ತಂತ್ರಗಾರಿಕೆಯಿಂದ ಭೇದಿಸಲು ಸಾಧ್ಯವೇ? ಅಥವಾ ಈಗ ಡಿಕೆಶಿ ಪಕ್ಷದ ಅಧ್ಯಕ್ಷರಾಗಿ ತೆಗೆದುಕೊಂಡ ಕ್ರಮಗಳನ್ನು ಒಪ್ಪಿಕೊಳ್ಳುವುದಕ್ಕೆ ಸಾಧ್ಯವೆ?

ಡಿ.ಕೆ. ಶಿವಕುಮಾರ್ ಅವರು ಅಹಿಂದ ಬಲವನ್ನು 'ಧ್ವಂಸ' ಮಾಡದೆ, ಆ ಬಲದ 'ದಿಕ್ಕು' ಬದಲಿಸಲು ಮಾಡುತ್ತಿರುವ ಯತ್ನದ ಆರಂಭದಲ್ಲೇ ಸೋತಿರುವುದು ಕಾಣಿಸುತ್ತಿದೆ. ಅಹಿಂದವನ್ನು ಪೂರ್ಣವಾಗಿ ಕಳೆದುಕೊಂಡರೆ ಕಾಂಗ್ರೆಸ್ ಅಸ್ತಿತ್ವಕ್ಕೇ ಧಕ್ಕೆಯಾಗುತ್ತದೆ. ಹೀಗಾಗಿ, ಅವರು ಸಿದ್ದರಾಮಯ್ಯನವರ ಹಿಡಿತದಿಂದ ಅಹಿಂದವನ್ನು ಬಿಡಿಸಿ, ಅದನ್ನು ಪಕ್ಷದ ಅಡಿಯಲ್ಲಿ ಅಥವಾ ತಮ್ಮ ನಾಯಕತ್ವದ ಅಡಿಯಲ್ಲಿ ತರಲು ಪ್ರಯತ್ನಿಸುತ್ತಿದ್ದಾರೆ. ಆ ಪ್ರಯತ್ನದ ಭಾಗವಾಗಿಯೇ ಸಿದ್ದರಾಮಯ್ಯ ಅವರ ಎಡ-ಬಲದಲ್ಲಿರುವ ಎಲ್ಲಾ ನಾಯಕರನ್ನು(ಕೆ.ಎನ್ ರಾಜಣ್ಣ, ಮುಖ್ಯಮಂತ್ರಿಗಳ ರಾಜಕೀಯ ಕಾರ್ಯದರ್ಶಿಯಾಗಿದ್ದ ಕೆ.ಗೋವಿಂದರಾಜ್, ನಸೀರ್ ಅಹ್ಮದ್, ಅಬ್ದುಲ್ ಜಬ್ಬಾರ್) ಹಂತಹಂತವಾಗಿ ಪಕ್ಷದ ಅಧಿಕಾರದಿಂದ ದೂರ ಮಾಡುತ್ತಿದ್ದಾರೆ. ಬಹುಶಃ ಇದು ಅವರ ವಿಧಾನಸೌಧದ ಮೂರನೇ ಮಹಡಿಯ ಸಿಎಂ ಕುರ್ಚಿಯ ಮೇಲೆ ಭದ್ರವಾಗಿ ಕೂರುವ ಕನಸನ್ನು ಕನಸಾಗಿಯೇ ಉಳಿಯುವಂತೆ ಮಾಡಿದರೂ ಅಚ್ಚರಿಯೇನಿಲ್ಲ. 

ಶಿಸ್ತು ಕ್ರಮದ ಹಿಂದೆ ಡಿಕೆಶಿ ಅವರ ಯೋಜನೆ ಏನು ?

ಕಾಂಗ್ರೆಸ್ ಪಕ್ಷದ ಇತ್ತೀಚಿನ ಶಿಸ್ತು ಕ್ರಮಗಳು, ವಿಶೇಷವಾಗಿ ಮುಸ್ಲಿಂ ನಾಯಕರಾದ ಎಂಎಲ್ಸಿ ಅಬ್ದುಲ್ ಜಬ್ಬಾರ್ ಮತ್ತು ನಸೀರ್ ಅಹಮದ್ ಅವರ ವಿರುದ್ಧ ಕೈಗೊಂಡಿರುವ ನಿರ್ಧಾರಗಳ ಹಿಂದೆ ಡಿ.ಕೆ. ಶಿವಕುಮಾರ್ (DKS) ಅವರ ದೂರಗಾಮಿ ರಾಜಕೀಯ ಲೆಕ್ಕಾಚಾರಗಳು ಇರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಕೆಪಿಸಿಸಿ ಅಧ್ಯಕ್ಷರಾಗಿ ಡಿ.ಕೆ. ಶಿವಕುಮಾರ್ ಅವರು "ಪಕ್ಷ ಮೊದಲು, ವ್ಯಕ್ತಿ ನಂತರ" ಎಂಬ ಸಂದೇಶವನ್ನು ರವಾನಿಸಲು ಯತ್ನಿಸುತ್ತಿದ್ದಾರೆ. ದಾವಣಗೆರೆ ದಕ್ಷಿಣದಲ್ಲಿ ಮುಸ್ಲಿಂ ನಾಯಕರು ಬಂಡಾಯವೆದ್ದಾಗ ಅಥವಾ ಅಧಿಕೃತ ಅಭ್ಯರ್ಥಿ (ಸಮರ್ಥ್ ಶಾಮನೂರು) ಪರವಾಗಿ ಕೆಲಸ ಮಾಡದಿದ್ದಾಗ, ಅದನ್ನು 'ಅಶಿಸ್ತು' ಎಂದು ಪರಿಗಣಿಸಿ ಕಠಿಣ ಕ್ರಮ ಕೈಗೊಂಡಿದ್ದಾರೆ. ಇದು ಕೇವಲ ಮುಸ್ಲಿಂ ನಾಯಕರಿಗಷ್ಟೇ ಅಲ್ಲ, ಪಕ್ಷದ ಯಾರೇ ಆದರೂ ಬಂಡಾಯವೆದ್ದರೆ ಅಥವಾ ಒಳಗೊಳಗೆ ಸಂಚು ನಡೆಸಿದರೆ ಅಂತಹವರಿಗೆ ಜಾಗವಿಲ್ಲ ಎಂಬ ಎಚ್ಚರಿಕೆಯನ್ನು ಇಡೀ ಪಕ್ಷಕ್ಕೆ ನೀಡುವುದೆಂದು ಅವರು ಸಮರ್ಥಿಸಿಕೊಂಡರೂ, ಕಾಂಗ್ರೆಸ್ ನಂಬಿಕೊಂಡು ಬಂದಿರುವ ʼಅಹಿಂದʼಕ್ಕೆ ಡಿಕೆಶಿ ನೀಡಿದ ಹೊಡೆತ ಅಲ್ಲವೇ? 

ಶಿಸ್ತು ಕ್ರಮಕ್ಕೆ ಒಳಗಾದ ನಸೀರ್ ಅಹಮದ್ ಅವರು ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ರಾಜಕೀಯ ಕಾರ್ಯದರ್ಶಿಯಾಗಿದ್ದರು. ಹಾಗೆಯೇ ಅಬ್ದುಲ್ ಜಬ್ಬಾರ್ ಕೂಡ ಸಿದ್ದರಾಮಯ್ಯನವರ ಆಪ್ತ ವಲಯದಲ್ಲಿ ಗುರುತಿಸಿಕೊಂಡವರು. ಇವರ ಮೇಲೆ ಕ್ರಮ ಕೈಗೊಳ್ಳುವ ಮೂಲಕ, ಸಿದ್ದರಾಮಯ್ಯನವರ ಪ್ರಭಾವದ ವಲಯದಲ್ಲಿದ್ದ ಅಹಿಂದ ನಾಯಕರ ಬಲವನ್ನು ಡಿ.ಕೆ. ಶಿವಕುಮಾರ್ ಕುಗ್ಗಿಸುತ್ತಿದ್ದಾರೆ ಎಂಬ ವಿಶ್ಲೇಷಣೆ ಇದೆ. ಇದು ಅವರ 'ಸಿಎಂ' ಗಾದಿಯ ಹಾದಿಯಲ್ಲಿ ಎದುರಾಗಬಹುದಾದ ಅಡೆತಡೆಗಳನ್ನು ನಿವಾರಿಸಿಕೊಳ್ಳುವ ಒಂದು ತಂತ್ರವೂ ಆಗಿರಬಹುದು. ಮುಸ್ಲಿಂ ಸಮುದಾಯದ ಪ್ರಬಲ ನಾಯಕರನ್ನು ನಿಯಂತ್ರಿಸುವ ಮೂಲಕ, ಆ ಜಾಗಕ್ಕೆ ತಮಗೆ ನಿಷ್ಠರಾಗಿರುವ ಅಥವಾ ಪಕ್ಷದ ಸಿದ್ಧಾಂತಕ್ಕೆ ಬದ್ಧರಾಗಿರುವ ಹೊಸ ತಲೆಮಾರಿನ ನಾಯಕರನ್ನು ತಂದು ಕೂರಿಸಲು ಡಿಕೆಶಿ ಯೋಜಿಸುತ್ತಿರಬಹುದು. 

ಈ ಇಡೀ ಬೆಳವಣಿಗೆಯ ಕೇಂದ್ರಬಿಂದು ಸಚಿವ ಜಮೀರ್ ಅಹಮದ್ ಖಾನ್ ಎನ್ನಲಾಗುತ್ತಿದೆ. ಈಗಾಗಲೇ ಅಬ್ದುಲ್ ಜಬ್ಬಾರ್ ಮತ್ತು ನಸೀರ್ ಅಹಮದ್ ಅವರ ಮೇಲೆ ಕ್ರಮವಾಗಿರುವುದರಿಂದ, ಮುಂದಿನ ಗುರಿ ಜಮೀರ್ ಅವರೇ ಎಂಬ ಚರ್ಚೆ ರಾಜಕೀಯ ವಲಯದಲ್ಲಿ ನಡೆಯುತ್ತಿದೆ. ಇದು ಜಮೀರ್ ಅವರ ಪ್ರಭಾವವನ್ನು ತಗ್ಗಿಸಲು ಡಿಕೆಶಿ ಹೂಡಿರುವ ವ್ಯೂಹವಾಗಿದೆ.

ಡಿ.ಕೆ. ಶಿವಕುಮಾರ್ ಅವರ ಈ 'ಶಿಸ್ತು ಕ್ರಮ'ಗಳು ಕೇವಲ ಒಂದು ಸಮುದಾಯದ ವಿರುದ್ಧದ್ದಲ್ಲ, ಬದಲಿಗೆ ಪಕ್ಷದಲ್ಲಿ ಸಿದ್ದರಾಮಯ್ಯನವರ ವರ್ಚಸ್ಸನ್ನು ಕುಗ್ಗಿಸಲು ಮತ್ತು ತಮ್ಮ ನಾಯಕತ್ವವನ್ನು ಅಬಾಧಿತಗೊಳಿಸಲು ಮಾಡುತ್ತಿರುವ 'ಪವರ್ ಗೇಮ್'. ಅಹಿಂದ ಮತಬ್ಯಾಂಕ್ ಕಾಂಗ್ರೆಸ್ ಜೊತೆಗೇ ಇರಬೇಕು, ಆದರೆ ಅದರ ನಾಯಕತ್ವ ಮಾತ್ರ ಸಿದ್ದರಾಮಯ್ಯನವರೊಬ್ಬರ ಕೈಯ್ಯಲ್ಲಿ ಇರಬಾರದು ಎನ್ನುವುದು ಡಿಕೆಶಿ ಅವರ ಅಘೋಷಿತ ನೀತಿಯಂತಿದೆ.

ʼಅಹಿಂದʼ ಅಸಮಾಧಾನ ಕಾಂಗ್ರೆಸ್ ಗೆ ಮರಣಶಾಸನ?

ಕಾಂಗ್ರೆಸ್ ಪಕ್ಷಕ್ಕೆ 'ಅಹಿಂದ' (ಅಲ್ಪಸಂಖ್ಯಾತ, ಹಿಂದುಳಿದ ವರ್ಗ, ದಲಿತ) ಎನ್ನುವುದು ಕೇವಲ ಮತಬ್ಯಾಂಕ್ ಅಲ್ಲ, ಅದು ಪಕ್ಷದ ಅಸ್ತಿತ್ವದ ಬೆನ್ನೆಲುಬು. ಒಂದು ವೇಳೆ ಈ ಅಹಿಂದ ಬಲವನ್ನು ಕಾಂಗ್ರೆಸ್ ಕಳೆದುಕೊಂಡರೆ, ಪಕ್ಷದ ಭವಿಷ್ಯ ಗಂಭೀರ ಸಂಕಷ್ಟಕ್ಕೆ ಸಿಲುಕುವುದರಲ್ಲಿ ಸಂಶಯವಿಲ್ಲ.

ಕರ್ನಾಟಕದಲ್ಲಿ ಅಹಿಂದ ವರ್ಗದ ಜನಸಂಖ್ಯೆ ಶೇ. 60ಕ್ಕಿಂತ ಹೆಚ್ಚಿದೆ ಎಂದು ಹೇಳಲಾಗುತ್ತದೆ. 2023ರ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ 135 ಕ್ಷೇತ್ರಗಳಲ್ಲಿ ಗೆಲ್ಲುವುದಕ್ಕೆ ಪ್ರಮುಖ ಕಾರಣ ಈ ವರ್ಗದ ಏಕಪಕ್ಷೀಯ ಬೆಂಬಲ. ದಲಿತರ ಪೈಕಿ ಸುಮಾರು ಶೇ. 66 ರಷ್ಟು ಮತ್ತು ಮುಸ್ಲಿಂ ಸಮುದಾಯದ ಶೇ. 92 ರಷ್ಟು ಮತಗಳು ಕಾಂಗ್ರೆಸ್ಗೆ ಲಭಿಸಿದ್ದವು. ಒಂದು ವೇಳೆ ಈ ಮತಗಳಲ್ಲಿ ಶೇ. 10-15ರಷ್ಟು ಕುಸಿತ ಕಂಡರೂ ಕಾಂಗ್ರೆಸ್ ಗೆ ಕುತ್ತು ಖಂಡಿತ. 

ಬಿಜೆಪಿ ಈಗಾಗಲೇ ಹಿಂದುಳಿದ ವರ್ಗಗಳ (OBC) ಸಣ್ಣ ಸಣ್ಣ ಸಮುದಾಯಗಳನ್ನು ಒಡೆದು ಆಳುವ ತಂತ್ರಗಾರಿಕೆಯ ಮೂಲಕ ತನ್ನತ್ತ ಸೆಳೆಯಲು ಯತ್ನಿಸುತ್ತಿದೆ. ಕಾಂಗ್ರೆಸ್ ಅಹಿಂದ ಬಲವನ್ನು ಕಳೆದುಕೊಂಡರೆ, ಆ ಮತಗಳು ಸಹಜವಾಗಿಯೇ ಬಿಜೆಪಿ ಅಥವಾ ಪ್ರಾದೇಶಿಕ ಪಕ್ಷಗಳಾದ ಜೆಡಿಎಸ್ನತ್ತ ವಾಲಬಹುದು. ಇದು ಕಾಂಗ್ರೆಸ್ಗೆ ಚೇತರಿಸಿಕೊಳ್ಳಲಾಗದ ಪೆಟ್ಟು ನೀಡಬಹುದು ಎನ್ನುವುದರಲ್ಲಿ ಸಂಶಯವಿಲ್ಲ. 

ಕಾಂಗ್ರೆಸ್ನಲ್ಲಿ ಸಿದ್ದರಾಮಯ್ಯ ಅವರು ಅಹಿಂದ ವರ್ಗದ ಪ್ರಶ್ನಾತೀತ ನಾಯಕರಾಗಿ ಗುರುತಿಸಿಕೊಂಡಿದ್ದಾರೆ. ಈಗ ಮುಸ್ಲಿಂ ನಾಯಕರ ವಿರುದ್ಧದ ಶಿಸ್ತು ಕ್ರಮಗಳು ಅಥವಾ ಡಿ.ಕೆ. ಶಿವಕುಮಾರ್ ಅವರ ಒಕ್ಕಲಿಗ ಕೇಂದ್ರಿತ ರಾಜಕಾರಣ ಅಹಿಂದ ವರ್ಗದಲ್ಲಿ "ನಮಗೆ ಕವಡೆ ಕಾಸಿನ ಕಿಮ್ಮತ್ತಿಲ್ಲ" ಎಂಬ ಭಾವನೆ ಮೂಡಿಸಿದರೆ, ಆ ವರ್ಗಗಳು ಕಾಂಗ್ರೆಸ್ನಿಂದ ದೂರ ಸರಿಯುತ್ತವೆ. ಅಹಿಂದವನ್ನು ಕಳೆದುಕೊಂಡ ಕಾಂಗ್ರೆಸ್ ಕೇವಲ ಒಂದು ಸಮುದಾಯದ (ಒಕ್ಕಲಿಗ) ಪಕ್ಷವಾಗಿ ಉಳಿಯುವ ಅಪಾಯವಿದೆ. ಅಹಿಂದ ಬಲವಿಲ್ಲದ ಕಾಂಗ್ರೆಸ್, ಇಂಧನವಿಲ್ಲದ ವಾಹನದಂತಾಗುತ್ತದೆ.

ಇನ್ನು, ಒಕ್ಕಲಿಗ ಮತ್ತು ಲಿಂಗಾಯತ ಮತಗಳು ಬಿಜೆಪಿ ಮತ್ತು ಜೆಡಿಎಸ್ ನಡುವೆ ಹಂಚಿಹೋಗುತ್ತಿರುತ್ತವೆ. ಕಾಂಗ್ರೆಸ್ಗೆ ಉಳಿದಿರುವ ಏಕೈಕ ಭದ್ರಕೋಟೆ ಅಹಿಂದ. ಹಾಗಾಗಿ, ಅಹಿಂದ ಸಮುದಾಯದ ವಿಶ್ವಾಸವನ್ನು ಉಳಿಸಿಕೊಳ್ಳದೆ ಹೋದರೆ ಕಾಂಗ್ರೆಸ್ಗೆ ಕರ್ನಾಟಕದಲ್ಲಿ ಭವಿಷ್ಯ ಬಹಳ ಕಠಿಣವಾಗಲಿದೆ.

ಈ ನಡುವೆ ಸಿದ್ದರಾಮಯ್ಯರನ್ನು ಕೆಣಕಲು ಹೋಗಿ ಪಕ್ಷವನ್ನು ಅಧಿಕಾರಕ್ಕೇರದೇ ಇರುವ ಹಾಗೆ ಮಾಡಿದರೇ ಡಿಕೆ ಶಿವಕುಮಾರ್ ಎನ್ನುವ ಪ್ರಶ್ನೆ ಮೂಡುತ್ತದೆ. ಸಿದ್ದರಾಮಯ್ಯನವರನ್ನು ಕೆಣಕುವ ಮೂಲಕ ಡಿ.ಕೆ. ಶಿವಕುಮಾರ್ ಅವರು ಅರಿವಿಲ್ಲದೆಯೇ ಪಕ್ಷದ ಅಡಿಪಾಯಕ್ಕೆ (ಅಹಿಂದ) ಪೆಟ್ಟು ನೀಡುತ್ತಿದ್ದಾರೆಯೇ ಎಂಬ ಪ್ರಶ್ನೆಯೂ ಇದೆ. 

ಸಿದ್ದರಾಮಯ್ಯ ಅವರ ರಾಜಕೀಯ ಅಸ್ತಿತ್ವವಿರುವುದೇ ಅಹಿಂದ ವರ್ಗದ ಬೆಂಬಲದ ಮೇಲೆ. ಡಿ.ಕೆ. ಶಿವಕುಮಾರ್ ಅವರು ಸಿಎಂ ಸ್ಥಾನಕ್ಕಾಗಿ ಒಕ್ಕಲಿಗ ಮಠಾಧೀಶರನ್ನು ಮುಂದಿಟ್ಟುಕೊಂಡು ಒತ್ತಡ ಹೇರುತ್ತಿರುವುದು ಅಹಿಂದ ವರ್ಗಗಳಲ್ಲಿ ಅಸಮಾಧಾನ ಮೂಡಿಸಿದೆ. "ನಾವು ಮತ ಹಾಕಿ ಗೆಲ್ಲಿಸಿದ ಸರ್ಕಾರದಲ್ಲಿ ನಮ್ಮ ನಾಯಕ(ಸಿದ್ದರಾಮಯ್ಯ)ನನ್ನು ಕಡೆಗಣಿಸಲಾಗುತ್ತಿದೆ" ಎಂಬ ಭಾವನೆ ಅಹಿಂದ ವರ್ಗಗಳಲ್ಲಿ ಮೂಡಿದರೆ, ಅದು 2028ರ ಚುನಾವಣೆಯಲ್ಲಿ ಕಾಂಗ್ರೆಸ್ಗೆ ಮರಣಶಾಸನವಾಗಬಹುದು ಎನ್ನುವುದರಲ್ಲಿ ಅನುಮಾನವಿಲ್ಲ.

- ಶ್ರೀರಾಜ್‌ ವಕ್ವಾಡಿ