ಒಕ್ಕಲಿಗ ಸಾಂಪ್ರದಾಯಿಕ ಮತಗಳನ್ನು ವಿಭಜಿಸಲಿದೆಯೆ ʼಉರಿನಂಜುʼ ?

ಹಳೆಮೈಸೂರಿಗಾಗಿ ತ್ರಿಪಕ್ಷಗಳ ಹೋರಾಟ । ಭಾವನಾತ್ಮಕ ಅಸ್ತ್ರಕ್ಕಿಲ್ಲಿ ಫಲ ?

ಒಂದು ಕಾಲದಲ್ಲಿ ಮೈಸೂರು ರಾಜ್ಯಕ್ಕೆ ಒಳಪಡುತ್ತಿದ್ದ ಹಳೆ ಮೈಸೂರು ಭಾಗವು ಈಗ ಕರ್ನಾಟಕ ರಾಜ್ಯದಲ್ಲಿ ಪ್ರಮುಖ ರಾಜಕೀಯ ಕಣಗಳಲ್ಲಿ ಒಂದಾಗಿದೆ. ರಾಜ್ಯ ಶಾಸಕಾಂಗದ ಅರ್ಧದಷ್ಟು ಶಾಸಕರನ್ನು ಹೊಂದಿರುವ ಈ ಭಾಗವು ಒಂದು ಹಂತದಲ್ಲಿ ನಿರ್ಣಾಯಕ ರಾಜಕೀಯ ಕಣವಾಗಿಯೂ ಬದಲಾಗಿದೆ. ಸಾಂಪ್ರದಾಯಿಕವಾಗಿ ಇದು ಕಾಂಗ್ರೆಸ್‌ ಹಾಗೂ ಜನತಾದಳದ ಭದ್ರ ಕೋಟೆಯಾಗಿತ್ತು. 

ಕಳೆದ ಎರಡು ದಶಕಗಳಿಂದ ಬಿಜೆಪಿ ಈ ಭಾಗಗಳ ಮೇಲೆ ಹೆಚ್ಚು ಗಮನಹರಿಸಿಕೊಂಡಿದ್ದು, ಬಿಜೆಪಿಯೂ ಕೂಡ ಈ ಭಾಗದಲ್ಲಿ ಜಿದ್ದಾಜಿದ್ದಿನ ಹೋರಾಟವನ್ನು ಚುನಾವಣೆಯಲ್ಲಿ ಸೃಷ್ಟಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ. ೨೦೧೯ರ ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿ ಕಾಂಗ್ರೆಸ್‌ ಹಾಗೂ ಜೆಡಿಎಸ್‌ ಮೈತ್ರಿ ಮಾಡಿಕೊಂಡಿದ್ದಾಗ ಬಿಜೆಪಿಗೆ ಈ ಭಾಗದಲ್ಲಿ ನುಸುಳುವುದಕ್ಕೆ ಅಪಾರವಾದ ಅವಕಾಶವನ್ನು ಮಾಡಿಕೊಟ್ಟಿತು. ಸಾಂಪ್ರದಾಯಿಕವಾಗಿ ಕಾಂಗ್ರೆಸ್‌ ಹಾಗೂ ಜೆಡಿಎಸ್‌ ಗೆ ಅಂಟಿಕೊಂಡಿದ್ದ ಕೆಲವು ಕ್ಷೇತ್ರಗಳನ್ನು ಹೊರತುಪಡಿಸಿದರೇ, ಬಿಜೆಪಿ ಉಳಿದೆಡೆ ಮಹತ್ತರವಾದ ಸಾಧನೆಯನ್ನೇ  ಮಾಡಿದೆ ಎಂದು ಹೇಳಬಹುದಾಗಿದೆ.  

ಪ್ರಬಲವಾದ ಒಕ್ಕಲಿಗ ಜಾತಿಯ ಮತಗಳು, ಹಿಂದುಳಿದ ಜಾತಿಗಳು, ದಲಿತ ಮತಗಳು ಇಲ್ಲಿ ಎಲ್ಲಾ ಚುನಾವಣೆಗಳಲ್ಲಿ ಮಹತ್ತರವಾದ ಪಾತ್ರವಹಿಸುತ್ತವೆ ಎನ್ನುವುದು ಅಕ್ಷರಶಃ ಸತ್ಯ. ಈ ಜಾತಿಗಳ ಪ್ರಾಬಲ್ಯವಿಲ್ಲದೇ ಯಾವುದೇ ಚುನಾವಣಾ ಲೆಕ್ಕಾಚಾರ ಪೂರ್ಣಗೊಳ್ಳುವುದಿಲ್ಲ ಎಂಬ ವಿಚಾರ ಕರ್ನಾಟಕ ರಾಜ್ಯ ರಾಜಕಾರಣದ ಬಿಡಾರದಲ್ಲಿ ಸಾಮಾನ್ಯವಾದದ್ದು. ಇನ್ನು, ಪ್ರತಿ ಚುನಾವಣೆಯಲ್ಲಿ ದಕ್ಷಿಣ ಕರ್ನಾಟಕವನ್ನು ಕೇಂದ್ರೀಕರಿಸಿಕೊಂಡು ತಂತ್ರ ಹೂಡುತ್ತಿದ್ದ ಬಿಜೆಪಿ ಈ ಬಾರಿ ಹಳೆ ಮೈಸೂರುನತ್ತೆ ಹೆಚ್ಚು ಫೋಕಸ್‌ ಮಾಡಿದೆ ಅಂತನ್ನಿಸುತ್ತಿದೆ. 

ಇತ್ತೀಚಿಗಿನ ವರ್ಷಗಳಲ್ಲಿ ಈ ಭಾಗದ ಒಕ್ಕಲಿಗ ಮತಗಳು ಕಾಂಗ್ರೆಸ್, ಜೆಡಿಎಸ್‌ ಅಷ್ಟೇ ಅಲ್ಲದೇ, ಈಗ ಬಿಜೆಪಿಯಲ್ಲಿಯೂ ಹಂಚಿಹೋಗುತ್ತಿರುವುದನ್ನು ಇಲ್ಲಿ ಗಮನಿಸಬಹುದು. ಬಿಜೆಪಿ ಕಡೆಗೂ ಮತ ವಿಭಜನೆಯಾಗಿ ಹೋಗುತ್ತಿರುವುದರಿಂದ ಇಲ್ಲಿ ಸಾಂಪ್ರದಾಯಿಕವಾಗಿ ಪಾರುಪತ್ಯ ಉಳಿಸಿಕೊಂಡು ಬಂದಿರುವ ಕಾಂಗ್ರೆಸ್‌, ಜೆಡಿಎಸ್‌ ಗೆ ಒಂದಿಷ್ಟು ರಾಜಕೀಯ ಹೊಡೆತವನ್ನು ನೀಡಿದೆ.  ಇನ್ನು, ೨೦೧೯ರ ಲೋಕಸಭೆ ಚುನಾವಣೆಯಲ್ಲಿ ಒಕ್ಕಲಿಗ ಮತಗಳ ವಿಭಜನೆಯಿಂದಾಗಿ ಬಿಜೆಪಿ ಇಲ್ಲಿ ಅಸಾಧಾರಣ ಸಾಧನೆ ಮಾಡಿತ್ತು ಎನ್ನುವುದು ಉಲ್ಲೇಖಿಸಬಹುದಾದ ವಿಷಯ. 

ಬಹುಮತ ಸಾಧಿಸುವುದಕ್ಕೆ ಒಕ್ಕಲಿಗ ಮತಗಳನ್ನು ತನ್ನತ್ತ ಸೆಳೆದುಕೊಳ್ಳುವುದರಿಂದ ನಿರ್ಣಾಯಕ ಫಲಿತಾಂಶವನ್ನು ನಿರೀಕ್ಷಿಸಬಹುದೆಂದು ಆಡಳಿತ ಪಕ್ಷ ಇಲ್ಲಿ ಅರಿತುಕೊಂಡಿದೆ. ಇದಕ್ಕೆ ಪೂರಕವೆಂಬಂತೆ ತನ್ನ ಒಕ್ಕಲಿಗ ಸಮುದಾಯದ ಪ್ರಭಾವಿ ನಾಯಕರುಗಳನ್ನು ಈ ಭಾಗಗಳಲ್ಲಿ ಪ್ರಚಾರದ ಉಸ್ತುವಾರಿ ಜವಾಬ್ದಾರಿ ಕೊಟ್ಟಿರುವುದನ್ನು ಗಮನಿಸಬಹುದಾಗಿದೆ. ಬೆಂಗಳೂರು, ಮಂಡ್ಯ, ತುಮಕೂರು, ಮಂಡ್ಯ ಮತ್ತು ಹಾಸನದ ಮೇಲೆ ಪಕ್ಷ ಸೂಕ್ಷ್ಮ ಕಣ್ಣಿಟ್ಟಿರುವುದನ್ನು ಈ ಹಿನ್ನಲೆಯಲ್ಲಿ ನೋಡಬೇಕಿದೆ. 

ಎಲ್ಲರಿಗೂ ಗೊತ್ತಿರುವ ಹಾಗೆ ಜೆಡಿಎಸ್‌ ಪ್ರಸ್ತುತತೆಗೆ ಬರುವುದಕ್ಕೆ ಮೂಲ ಕಾರಣವೇ ಒಕ್ಕಲಿಗ ಮತಗಳು. ಜೆಡಿಎಸ್‌ ನಾಯಕತ್ವವೂ ಕೂಡ ಈ ಸಮುದಾಯದ ಹಿನ್ನಲೆಯಿಂದಲೇ ಬಂದಿದ್ದಾಗಿರುವುದರಿಂದ ಈ ಭಾಗದಲ್ಲಿ ಹೆಚ್ಚು ಪ್ರಭಾವವನ್ನು ಹೊಂದಿದೆ. ಪಕ್ಷದಲ್ಲಿದ್ದ ಆಂತರಿಕ ಸಮಸ್ಯೆಗಳ ಹೊರತಾಗಿಯೂ ಜೆಡಿಎಸ್‌ ಈ ಭಾಗದಲ್ಲಿ ಪ್ರಭಾವವನ್ನು ಹೊಂದಿದೆ. ಆದರೇ, ಕಾಂಗ್ರೆಸ್‌ ನೊಂದಿಗೆ ೨೦೧೯ರಲ್ಲಿ ಮೈತ್ರಿ ಮಾಡಿಕೊಂಡು ಲೋಕಸಭಾ ಚುನಾವಣೆ ಎದುರಿಸಿದ್ದಾಗ ಭಾರಿ ಹಿನ್ನಡೆ ಅನುಭವಿಸಿತ್ತು. ಸ್ವತಃ ಜೆಡಿಎಸ್‌ ನ ಹೈ ಕಮಾಂಡರ್‌ ಎಸ್‌ ಡಿ ದೇವೇಗೌಡ್ರು ಒಕ್ಕಲಿಗ ಭದ್ರಕೋಟೆ ಎಂದು ಪರಿಗಣಿಸಲ್ಪಡುವ ತುಮಕೂರು ಕ್ಷೇತ್ರವನ್ನು ಕಳೆದುಕೊಂಡರು. ಈಗ ವಿಧಾನ ಸಭಾ ಚುನಾವಣೆ ಬರುತ್ತಿದೆ ಮತ್ತು ಬರುವ ವರ್ಷ ಲೋಕಸಭಾ ಚುನಾವಣೆ, ಈ ಹೊತ್ತಿನಲ್ಲಿ ಪಕ್ಷ ತನ್ನ ಅಸ್ತಿತ್ವವನ್ನು ಪುನಶ್ಚೇತನಗೊಳಿಸಿಕೊಳ್ಳುವ ಅಗ್ನಿ ಪರೀಕ್ಷೆಯನ್ನು ಎದುರಿಸಬೇಕಿದೆ. 

ಇತ್ತ ಒಕ್ಕಲಿಗ ಸಮುದಾಯದ ಮತಗಳನ್ನು ಸೆಳೆದುಕೊಳ್ಳುವುದಕ್ಕೆ ಕಾಂಗ್ರೆಸ್‌ ಸರ್ವ ಪ್ರಯತ್ನ ನಡೆಸುತ್ತಿದೆ. ಕೆಪಿಸಿಸಿ ಅಧ್ಯಕ್ಷ ಹಾಗೂ ಕಾಂಗ್ರೆಸ್‌ ನ ಮುಖ್ಯಮಂತ್ರಿ ಹುದ್ದೆಯ ಆಕಾಂಕ್ಷಿ ಡಿ. ಕೆ ಶಿವಕುಮಾರ್‌ ಪ್ರಬಲ ಸಮುದಾಯದ ಮತಗಳನ್ನು ತನ್ನೆಡೆಗೆ ಸೆಳೆದುಕೊಳ್ಳುವುದಕ್ಕೆ ಭಾವನಾತ್ಮಕವಾಗಿ ಪ್ರಚಾರ ಸಭೆಗಳಲ್ಲಿ ಮಾತಾಡಿದ್ದನ್ನು, ಅಕ್ಷರಶಃ ಅಂಗಲಾಚಿ ಮತ ಬೇಡಿದಂತೆ ಒಂದು ಅವಕಾಶ ಮಾಡಿಕೊಡಿ ಎಂದು ಕೇಳಿದ್ದನ್ನು ಈ ರಾಜ್ಯ ಕಂಡಿದೆ. ಬಿಜೆಪಿಯೊಂದಿಗಿನ ನೇರ ಸ್ಪರ್ಧೆಯಲ್ಲಿ ಪಕ್ಷವು ಪ್ರಜ್ಞಾಪೂರ್ವಕವಾಗಿ ತನ್ನ ಉನ್ನತ ನಾಯಕತ್ವದ ಸ್ಪೆಕ್ಟ್ರಮ್‌ ನಲ್ಲಿ ಒಕ್ಕಲಿಗ ಮುಖವನ್ನೇ ಮುಂದೆ ತಂದಿದೆ. ಕಾಂಗ್ರೆಸ್‌ ಗೆ ಡಿ. ಕೆ ಶಿವಕುಮಾರ್‌ ತಂದು ಕೊಡುವ ಒಕ್ಕಲಿಗ ಮತಗಳು ಅವರ ಮತ್ತು ಕಾಂಗ್ರೆಸ್‌ ನ ಭವಿಷ್ಯಕ್ಕೆ ನಿರ್ಣಾಯಕವಾಗಿರಲಿದೆ ಎನ್ನುವುದರಲ್ಲಿ ಸಂಶಯವೇ ಇಲ್ಲ. ಇತ್ತ ಬಿಜೆಪಿ ಒಬಿಸಿ ಕೋಟಾದಡಿಯಲ್ಲಿ ಮುಸ್ಲೀಮರಿಗಿದ್ದ ಶೇಕಡಾ ನಾಲ್ಕರಷ್ಟು ಮೀಸಲಾತಿಯನ್ನು ತೆಗೆದು ಹಾಕಿ ಮತ್ತು ಅವರನ್ನು ಬೇರೆ ಪೂಲ್‌ ಗೆ ವರ್ಗಾಯಿಸುವ ಕರ್ನಾಟಕ ಕ್ಯಾಬಿನೆಟ್‌ ನ ನಿರ್ಧಾರವು ತನ್ನ ರಾಜಕೀಯ ಅಜೆಂಡಾದ ನಿರೂಪಣೆಯನ್ನು ಸೃಷ್ಟಿಸುವ ನಿರ್ಣಾಯಕ ಪ್ರಯತ್ನ ಮಾಡಿದ್ದು, ಇದೇ ಒಕ್ಕಲಿಗ ಮತಗಳನ್ನು ತನ್ನತ್ತ ಸೆಳೆದುಕೊಳ್ಳುವುದೇ ಆಗಿದೆ. ಮುಸ್ಲೀಮರಿಗಿದ್ದ ಶೇಕಡಾ ೪ರಷ್ಟು ಮೀಸಲಾತಿಯನ್ನು ತೆಗೆದು ಈಗ ರಾಜ್ಯದ ಚುನಾವಣೆಯಲ್ಲಿ ನಿರ್ಣಾಯಕ ಸಮುದಾಯವೆಂದು ಕರೆಯಲ್ಪಡುವ ಒಬಿಸಿ ಒಕ್ಕಲಿಗ ಜಾತಿ ಹಾಗೂ ವೀರಶೈವ ಲಿಂಗಾಯತ ಸಮುದಾಯಗಳಿಗೆ ತಲಾ ಶೇಕಡಾ ಎರಡರಂತೆ ಹಂಚಿಕೆ ಮಾಡಿ ಚುನಾವಣೆ ಸಂದರ್ಭದಲ್ಲಿ ಬಿಜೆಪಿ ತನ್ನ ಅಧಿಕಾರದಿಂದ ಕ್ಲೆವರ್‌ ಗೇಮ್‌ ಆಡಿದೆ.  

೧೯೭೦ರ ದಶಕದಲ್ಲಿ ಡಿ, ದೇವರಾಜ್‌ ಅರಸ್‌ ಅವರು ರಾಜಕೀಯದಲ್ಲಿ ಮುಂಪಂಕ್ತಿಗೆ ಬಂದಾಗಿನಿಂದ ರಾಜ್ಯದಲ್ಲಿ ಧ್ವನಿಯಿಲ್ಲದ ಹಿಂದುಳಿದ ವರ್ಗದವರಿಗೆ ಸಾಮಾಜಿಕವಾಗಿ, ರಾಜಕೀಯವಾಗಿ ಸ್ಥಾನಮಾನ ನೀಡಬೇಕು ಎಂಬ ಕೂಗು ಹೆಚ್ಚಿತು. ಅದಕ್ಕೆ ಮಹತ್ತರವಾದ ಕೊಡುಗೆ ನೀಡಿದವರು ದೇವರಾಜ್‌ ಅರಸ್.‌ ಹಿಂದುಳಿದ ವರ್ಗಗಳಿಗೆ ಸ್ಥಾನಮಾನ ದೊರಕಿಸುವ ಸಲುವಾಗಿ ಅರಸು ಮಾಡಿದ ಸೇವೆ ಅಮೋಘ. ಇಡೀ ದೇಶದಲ್ಲಿಯೇ ಹಿಂದುಳಿದ ವರ್ಗಗಳ ಬಗ್ಗೆ ಮೊದಲು ಚಿಂತನೆ ಮಾಡಿ ಕಾರ್ಯರೂಪಕ್ಕೆ ತಂದ ಶ್ರೇಯ ದೇವರಾಜ ಅರಸು ಅವರದ್ದು. ಅಂದಿನಿಂದ ರಾಜಕೀಯದಲ್ಲಿ ಹಿಂದುಳಿದ ವರ್ಗಕ್ಕೆ ಸ್ಥಾನಮಾನ ಸಿಗುತ್ತಿದೆ. ಮುಂದೆ ರಾಜಕೀಯದಲ್ಲಿ ಇದೇ ವಿಷಯ ರಾಜಕೀಯ ಸಿದ್ಧಾಂತವಾಗಿ ಬದಲಾಗಿದೆ ಕೂಡ. ೨೦೧೩ರ ರಾಜ್ಯ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ʼಅಹಿಂದʼ ಚಳುವಳಿ (ಹಿಂದುಳಿದ ವರ್ಗಗಳ ಮತ್ತು ದಲಿತರ ಒಕ್ಕೂಟ) ಕಾಂಗ್ರೆಸ್‌ ವರ್ಚಸ್ಸನ್ನು ಹೆಚ್ಚಿಸುವುದಕ್ಕೆ ಪ್ರಧಾನ ಪಾತ್ರ ವಹಿಸಿತ್ತು. ೨೦೧೮ರಲ್ಲಿ ಸಿದ್ದರಾಮಯ್ಯರವರನ್ನು ʼಅಹಿಂದ ನಾಯಕʼ ಎಂದೆಲ್ಲಾ ಬಿಂಬಿಸುವುದಕ್ಕೆ ಪಕ್ಷ ಪ್ರಯತ್ನ ಪಟ್ಟಿತ್ತಾದರೂ, ಇದೇ ರಾಜಕೀಯ ಅಸ್ತ್ರದ ಮೂಲಕ ಪಕ್ಷ ಅಧಿಕಾರ ಹಿಡಿಯುತ್ತದೆ ಎಂಬ ಹುರುಪಿನಲ್ಲಿತ್ತಾದರೂ ಕಾಂಗ್ರೆಸ್‌ ಗೆ ʼಅಹಿಂದʼ ವರ್ಕೌಟ್‌ ಆಗಿಲ್ಲ. 

ಈಗ ಬಿಜೆಪಿ ಈ ಅಸ್ತ್ರವನ್ನು ಹಿಡಿದುಕೊಂಡಿದೆ. ಹಲವು ರಾಜಕೀಯ ತಂತ್ರಗಳನ್ನು ಬಳಸಿಕೊಳ್ಳುತ್ತಿದೆ. ಹಿಂದುಳಿದ ಜಾತಿಗಳ ಮತಗಳನ್ನು ಕಾಂಗ್ರೆಸ್‌ ಹಾಗೂ ಜೆಡಿಎಸ್‌ ನ ವಿರುದ್ಧವಾಗಿ ಆಕ್ರಮಣಕಾರಿಯಾಗಿ ಬಳಸಿಕೊಳ್ಳುವ ಪ್ರಯತ್ನಕ್ಕೆ ಕೈ ಹಾಕಿದೆ. ಮೀಸಲಾತಿ ವಿಸ್ತರಿಸುವುದು ಮತ್ತು ಪಕ್ಷದ ಅತಿ ದೊಡ್ಡ ರಾಜಕೀಯ ಅಜೆಂಡಾದೊಂದಿಗೆ ಈ ವಿಷಯವನ್ನು ನಿರೂಪಿಸಿ, ಹಿಂದುಳಿದ ವರ್ಗ, ದಲಿತರಿಗೆ ಬಿಜೆಪಿ ಕೊಟ್ಟಷ್ಟು ಸ್ಥಾನಮಾನ ಬೇರೆ ಯಾವ ಪಕ್ಷವೂ ನೀಡಿಲ್ಲ ಎಂಬಂತೆ ಸ್ವಯಂ ಪ್ರಶಂಸೆ ತೆಗೆದುಕೊಳ್ಳುತ್ತಿದೆ. ಬಿಜೆಪಿ ಲಿಂಗಾಯತರಲ್ಲಿ ಸಾಂಪ್ರದಾಯಿಕವಾಗಿ ಪ್ರಬಲ ಅಸ್ತಿತ್ವವನ್ನು ಹೊಂದಿದೆ. ಈ ಮೀಸಲಾತಿ ವಿಸ್ತರಿಸಿದ್ದೇನೋ ಆಯ್ತು, ಇದು ಚುನಾವಣೆಯಲ್ಲಿ ಹೇಗೆ ಸಹಾಯ ಮಾಡುತ್ತದೆ ಎನ್ನುವುದು ಬಹಳ ಮುಖ್ಯ. ಬಿಜೆಪಿಯ ಈ ಮೀಸಲಾತಿ ವಿಚಾರದಲ್ಲಿ ಸಾಮಾಜಿಕ ನ್ಯಾಯ ಒದಗಿಸುವ ಪ್ರಯತ್ನವು ಸಂಭಾವ್ಯ ಸವಾಲುಗಳನ್ನು ಬಹುಷಃ ಎದರುಸಿಬೇಕಾದೀತು ಎಂದು ಕಾಣಿಸುತ್ತಿದೆ. ಈ ಸಂಖ್ಯೆ ಲೆಕ್ಕಾಚಾರದಲ್ಲಿಯೇ ಈ ನಿರ್ಣಾಯಕ ಸಮುದಾಯಗಳ ಒಂದು ಭಾಗವನ್ನು ಗೆಲ್ಲುವುದೇ ಕಾಂಗ್ರೆಸ್‌ ಹಾಗೂ ಬಿಜೆಪಿಯ ಪರಮ ಗುರಿಯಾಗಿದೆ.

ಭಾವನಾತ್ಮಕವಾಗಿ ಜನರನ್ನು ಹಿಡಿದಿಟುಕೊಳ್ಳುವ ರಾಜಕೀಯ ತಂತ್ರಗಾರಿಕೆಯನ್ನು ಹೂಡುವಲ್ಲಿ ಬಿಜೆಪಿ ಎತ್ತಿದ ಕೈ. ಈಗಾಗಲೇ ಮೈಸೂರು ट्ट ಬೆಂಗಳೂರು ನಡುವೆ ಸಂಚರಿಸುವ ಟಿಪ್ಪು ಎಕ್ಸ್‌ ಪ್ರೆಸ್‌ ರೈಲಿಗೆ ʼಒಡೆಯರ್‌ʼ ಎಂದು ಮರುನಾಮಕರಣ,  ಮೈಸೂರು ट्ट ತಾಳಗುಪ್ಪ ರೈಲಿಗೆ ರಾಷ್ಟ್ರಕವಿ ಕುವೆಂಪು ಹೆಸರನ್ನು ಮರು ನಾಮಕರಣ ಮಾಡಿದೆ. ಇತ್ತ, ಶ್ರೀರಂಗಪಟ್ಟಣದಲ್ಲಿ ಹನುಮಾನ್‌ ದೇವಸ್ಥಾನವನ್ನು ಧ್ವಂಸಗೊಳಿಸಿ ಟಿಪ್ಪು ಸುಲ್ತಾನ್‌ ಮಸೀದಿ ಕಟ್ಟಿದ್ದ ಎಂದು ಆರೋಪಿಸಿರುವ ಹಿಂದೂ ಜಾಗರಣ ವೇದಿಕೆಯು ಮತ್ತೆ ಅದೇ ಸ್ಥಳದಲ್ಲಿ ಹನುಮ ಮಂದಿರ ನಿರ್ಮಾಣ ಮಾಡುವುದಾಗಿ ಘೋಷಿಸಿದೆ, ಇನ್ನೊಂದೆಡೆ ರಾಮನಗರದ ರಾಮ ದೇವರ ಬೆಟ್ಟದಲ್ಲಿ ಶ್ರೀರಾಮ ಮಂದಿರ ನಿರ್ಮಾಣ ಸಂಬಂಧ ಸರ್ಕಾರದ ಮಟ್ಟದಲ್ಲಿ ಚಿಂತನೆ ನಡೆದಿದೆ, ಒಕ್ಕಲಿಗ ಅಭಿವೃದ್ಧಿ ನಿಗಮ ಸ್ಥಾಪಿಸಿ ೫೦೦ ಕೋಟಿ ಅನುದಾನ ಘೋಷಣೆ, ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನಾಡಪ್ರಭು ಕೆಂಪೇಗೌಡರ ೧೦೮ ಅಡಿ ಎತ್ತರದ ಪ್ರತಿಮೆ ನಿರ್ಮಾಣ, ಒಕ್ಕಲಿಗ ಮೀಸಲು, ಬಿಜೆಪಿ ಸೃಷ್ಟಿಯ ʼಉರಿನಂಜುʼ (ಟಿಪ್ಪುವನ್ನು ಕೊಂದ್ದದ್ದು ಉರಿಗೌಡ, ನಂಜೇಗೌಡ ವಿಷಯವನ್ನು ಸೃಷ್ಟಿಸಿ ರಾಜಕೀಯವಾಗಿ ಬಳಸಿಕೊಳ್ಳುವ ಪ್ರಯತ್ನ) ಹೀಗೆ ಒಂದೇ ಎರಡೇ..? ಭಾವನಾತ್ಮಕವಾಗಿ ಹಳೆ ಮೈಸೂರು ಭಾಗದಲ್ಲಿ ಬಿಜೆಪಿ ಒಕ್ಕಲಿಗರ ಮತ ಸೆಳೆಯುವುದಕ್ಕೆ ಇಷ್ಟೆಲ್ಲಾ ರಣತಂತ್ರ ಹೂಡಿದೆ. ಇಷ್ಟೆಲ್ಲಾ ಆಗಿಯೂ ಒಕ್ಕಲಿಗ ಮತಗಳು ಯಾವ ಕಡೆ ವಾಲುತ್ತದೆ ಎಂಬ ಪ್ರಶ್ನೆ ಪ್ರಶ್ನೆಯಾಗಿಯೇ ಉಳಿದಿದೆ. ಒಕ್ಕಲಿಗರ ಒಲವು ಬಿಜೆಪಿಗೋ ಅಥವಾ ಸಾಂಪ್ರದಾಯಿಕವಾಗಿ ಬಂದಂತೆ ಮತ್ತೆ ಜೆಡಿಎಸ್‌, ಕಾಂಗ್ರೆಸ್‌ ಗೆ ಹಂಚಿ ಹೋಗಲಿದೆಯೋ ಎಂಬುವುದನ್ನು ಕಾದು ನೋಡಬೇಕಿದೆ. 

-ಶ್ರೀರಾಜ್‌ ವಕ್ವಾಡಿ